Renaissance Marketplace cu Jam Session y Concierto di Jazz gratis

ORANJESTAD – Fanaticonan di Jazz na Aruba un biaha mas por goza di anochinan estupendo na Renaissance Marketplace. E centro comercial ta celebra Dia Internacional di Jazz 2016 den grandi cu no un, ni dos… pero cuater anochi di bon musica presenta pa artistanan local y internacional. Tur cos ta cuminsa dialuna 25 y diamars 26 di april proximo cu un Jam Session caminda un y tur ta invita pa bin cu nan instrumento. Hunto lo crea melodianan mientras ta disfruta di un anochi manera no sa wak aki na Aruba.

E celebracion ta culmina diabierna 29 y diasabra 30 di april cu anochinan grandi di concierto reuniendo artistanan di Merca, Puerto Rico, Venezuela y naturalmente, Aruba. Cuminsa y caba bo siman cu e tremendo tononan di jazz, treci na bida pa algun di e miho musiconan cu nos tin na Aruba y artistanan cu poco biaha bo tin e oportunidad pa presencia. E miho parti ta cu Renaissance Marketplace ta trece tur esaki pa su bishitantenan completamente gratis!

E Jam Session ta cuminsa riba ambos anochi for di 8’or na Tropical Grand Café den Renaissance Marketplace. Aki bo ta invita pa yega cu bo instrumento y toca hunto cu otro artistanan local e internacional mientras cu na mesun momento bo ta disfruta di e dushi musica di jazz. E anochi aki ta priminti di bira uno diferente y unico na Aruba.

Tuma algun dia pa sosega, pasobra Jazz lo resona un biaha mas den fin di siman y bo no lo kier perde esaki. Despues di un presentacion memorabel den e celebracion Dia Internacional di Jazz 2015, e vocalista Leonora Zenzalai Helm ta bek pa bolbe deleita e publico Arubiano. Hunto cu ne tambe lo t’ey saxofonista Rodolfo Reyes di Venezuela y e pianista nomina pa Grammy, Edsel Gomez for di Puerto Rico. Tambe tin studiantenan di jazz invita for di Venezuela pa complementa e repertorio musical.

Representando e talento grandi di nos isla, ta forma parti di e anochi aki The Aruba Vocal Jazz Ensemble & The Tritones, ademas di Franklin Grandaillo Jazz Orchestra, Carlos Bislip & Friends, e AMS Ensemble y mas. Sin duda un oportunidad estupendo pa sali for di cas, scucha bon musica y pasa un anochi estupendo na Renaissance Marketplace.

Pa mas informacion riba e actividadnan aki y mas di loke Renaissance Marketplace tin pa ofrece su bishitantenan busca nos Facebook na Renaissance Mall & Marketplace.