Gobierno a presenta lista di candidato pa Gobernador na fraccionnan

ORANJESTAD - E tres nombernan cu gobierno di Aruba ta buscando sosten p'e pa bira e proximo Gobernador di Aruba ta conoci. NoticiaCla.com tin informacion cu durante un reunion cortico dialuna entre prome minister Mike Eman y lidernan di fraccion, e nombernan cu a pidi sosten p'e ta actual minister Angel Bermudez, ex parlamentario di partido AVP Glenda Margareta y ex minister di partido AVP Israel "Ike" Posner. Di tur, a compronde cu Angel Bermudez ta esun cu ta 'lidera' e lista y cu gobierno kier mira como e proximo Gobernador. Esaki ta e prome biaha cu tin 'novedad' riba e asunto aki despues cu algun siman pasa e nomber di actual minister Angel Bermudez a 'lek' y e confirmacion di e mandatario despues, cu no a cay den bon tera cerca gobierno Hulandes. 

INTENCION

E intencion di e reunion tabata pa informa e lidernan di fraccion di e nombernan y mas importante ainda, pa busca nan sosten pa esaki. Pa regla, gobierno mester presenta Hulanda cu un lista di 3 nomber, cada un cu nan merito, y prueba e sosten mas amplio cu por tin. For di esey, Hulanda tin e desicion final den su man. Durante e encuentro cortico, prome minister Eman a mustra si cu Bermudez tabata e cantidato di preferencia y cu 'e lo spera cu' Bermudez haya e sosten di tur lider di fraccion. 

DESICION 

A pidi mesora pa den curso di diamars cada fraccion informe di nan desicion, y di un posibel otro nomber cu e fraccion por tin si e no ta di acuerdo cu e nomber(nan) cu ta poni. Esaki a pone cu den curso di awe e fraccionan mester a presenta esaki. NoticiaCla.com por a compronde cu varios fraccion a haci nan preguntanan, y a convoca nan preocupacion pa cierto candidato. E candidato cu mas tabatin pregunta ariba, tabata Bermudez. Loke a compronde tambe segun prome minister lo a laga sa durante e reunion di dialuna cu Hulanda, contrario na informacionan inicial, no necesariamente tin problema cu e candidatura di Bermudez, sino cu solamente e hecho cu su nomber a sali den publicidad prome, a pone cu nan no a gusta esaki ningun tiki y a reacciona mesora pa clarifica un ke otro. 

KICO TA PASA NA MEI

Mientrastanto e proceso ta continua y no tin informacion kico ta pasa aki dos siman ora cu e termino di actual Gobernador Refunjol yega na fin. Lo mas logico ta cu e actual Gobernador lo continua cu su termino 'extra' te ora cu ta asina leu cu Hulanda aproba e proximo candidato. Actualmente esaki ta parce e logica mas sigur mirando cu tambe pa e Gobernador suplente ta preparando un sucesor.