ATA y STA a firma CAO valido pa 3 proximo aña

ORANJESTAD - Trahadonan di Aruba Tourism Authority pa proximo 3 añanan tin un CAO (Collectieve Arbeids Overeenkomst), cu sigur ta duna nan un adelanto riba varios tereno. Diamars mainta esaki a keda firma entre e CEO di AHATA Ronella Tjin-Asjoe y presidente di Sindicato di Trahadonan di Aruba (STA) Diego de Cuba. Un negociacion cu no tabata facil, pero cu na final cu asistencia di mediador di gobierno, cu a wordo califica como un 'middenweg' pa ambos partido y cu a goza di aprobacion di ATA. 

CONTENIDO 

Segun Tjin Asjoe, ta contento cu como parti di e acuerdo, cu e pakete nobo, a discuti varios punto manera vacacion, aniversario, bonus adicional, child allowance cu ta aumenta tambe, seguro medico cu ta mira beneficio pa tur empleado, y un aumento di pensioen cu ta cay bou di PFTSA. A introduci un aanmoedigings bonus cu tambe ta nifica un adelanto pa e empleadonan, y un signing bonus, conforme palabracion. E parti mas critico y cu a tuma mas tempo tabata e incremento general den salario combina cu un programa di performance di e trahadonan. E CAO actual ta nifica un adelanto pa cada empleado di mas of menos 4.5% a base anual. Si analisa e 3 aña completo, e ta nifica un adelanto di 14% ora conta tur e diferente beneficionan cu ta cay bou di e CAO di ATA.