Zissu Properties NV a gana Preserva Malmok den corte di apelacion

ORANJESTAD - Awe mainta corte di apelacion a dicta na fabor di Zissu Properties NV, propietario di Ocean Z boutique hotel. Den combersacion cu abogado Kloes di Zissu Propierties NV, e abogado a confirma cu Corte di apelacion a revoca e sentencia di 13 di januari, cu ta prohibi e hotel di haya su permiso di hotel. "Corte di apelacion a bari esaki for di mesa" Kloes a confirma na NoticiaCla.com. 

ARGUMENTONAN USA

Mayoria di argumento uza pa e grupo Preserva Malmok, huesnan den apelacion a bari for di mesa. Entre nan, e hecho cu e hotel lo causa zonido excesivo, cu Zissu Properties NV lo ta actuando empugna cu ley. Evaluando tur e circumstancianan, Corte a revoca e sentencia e ora y a duna Zissu Properties NV como gana. Segun Kloes, no tin ningun obstaculo mas pa Zissu Properties NV haya su permiso di hotel, pero ta keda naturalmente na e minister encarga (Alex Schwengle) pa dicidi ki ora y con ta duna e permiso. Lesa e sentencia completo aki. 

SENTENCIA ANTERIOR

Tabata den un sentencia delanta luna pasa (e sentencia tabata poni pa 21 di maart inicialmente), peticion di doñonan di Ocean Z boutique hotel pa forsa minister pa duna nan un hotelvergunning a wordo declara no admisibel. Esaki a sosode tanto pa e caso di LAR como e caso sumario. Den ambos caso hues a mustra cu e doño, Zissu Properties NV e tempo ey no a bin cu argumentonan corecto. Tambe hues ta mustra cu e no a yega na trata e merito di e caso, pero a dicidi cu no por trata e caso pa varios motibo, y como tal ta declara e compania den ambos caso no admisibel. Entre e puntonan cu hues a uza pa argumenta su sentencia, e ta mustra cu Zissu Properties tabata laat cu nan obhecion contra desicion di corte, y tambe no por uza un carta di abogado como un beschikking. Di otro banda, hues a mustra gobierno tambe (lesa minister di salud) cu mester tuma un desicion si ta duna e permiso of no, y no por basa e desicion aki riba ‘otro factornan’ y mester hustifica su tardansa den un splicacion pa cu esaki.  

E CASO

Zissu Properties NV y pais Aruba (gobierno) a topa otro pa medio di nan respectivo abogadonan na tal ocasion unda cu  Zissu Properties a busca pa hues forsa minister di salud Alex Schwengle duna nan e permiso di hotel pa e hotel por cuminsa opera pa caba. “Minister no ta teniendo su mes na ley, ta actuando ilegal, y tin cu duna mi cliente su permiso di hotel”, abogado Winfred Kloes a argumenta pa su cliente Zissu Properties NV, mientras cu e doño Eva Zissu tabata wak den Corte. Abogado pa gobierno Hans Sjiem Fat a argumenta cu Zissu ta “abusa di e proceso legal y cu esaki ta nada mas cu un apelacion enmascara ”. E fundacion ‘Preserva Malmok’ a uni su mes na gobierno den e caso aki, representa pa abogado Brian Coffie, hunto cu ciudadanonan Harms, acesora pa abogado Dello Gomez. 

MINISTER ACTUANDO CONTRA LEY

E argumento principal di abogado di Zissu Properties e momento ey tabata cu su cliente ta e unico cu a tene su mes na tur regla y ley, y asina mes e no por opera su hotel. Tur esnan (propiedadnan cu tambe ta huur camber) otro no tin un acuerdo y nan cosnan no ta na ordo (segun e abogado), pero nan si por opera (nan hotel). Algo cu segun e abogado, no ta husto. Un otro problema cu e abogado ta mustra, ta cu e comparacion di propiedad ta inhusto. E hotel di su cliente tin ‘apenas’ 13 camber cu ta hospeda solamente 26 persona. Esaki mientras cu kier compara nan cu hotelnan cu ta hospeda porta 1000 persona pa propiedad. E atake principal tabata sinembargo riba e mandatario di salud Alex Schwengle, cu segun abogado di Zissu, ‘no ta tene su mes na ley y ta actua ilegal’. “E lo a firma e permiso, pero ora cu Zissu tabata pagando e placa pa e documento, a bin tende di e personal cu e minister a revoca e permiso debi na un sentencia den corte” Kloes a bisa. Esaki siendo cu e no tabatin motibo pa no duna e permiso. Den cuadro di esaki Kloes a uza tur posibel argumento, pa convence hues cu su cliente merece su permiso hotelero. 

AVISO Y CASONAN DEN CORTE

Segun Kloes, tur cos a cuminsa cu un aviso den prensa di su cliente, unda cu su cliente ta ofrece e propiedad pa, fuera di tin un hotel, ofrece fiesta pa dianan di fiesta. Algo cu a cay hopi malo den seno di e bisiñanan di e propiedad, y cu a conduci cu un caso sumario den corte. Ora cu a informa cu lo ‘para tur fiesta y no continua cu e plan ey, pero tene nan mes solamente na e plan hotelero, toch e bisiñanan a continua cu e caso. “Si no tabata pa e aviso porta, nunca lo nos tabata para akinan awo” Kloes a sigui bisa. 

PERDE PLACA 

E inversion di Sizzu di 5 miyon dollar ta pega awor cu e hotel no por opera segun e abogado. A bay den detayes riba tur parti di e proyecto, punto pa punto for di e permiso di construccion, e permiso di molester y cualkier otro permiso cu a keda otorga. A splica hues riba e construccion, e midi, e situacion y a invita e hues te hasta pa bishita e propiedad pa e mes convence su mes di e magnitud y e luhoso cu e propiedad ta. “Mi conoce e area bon. Mi ta haci deporte eybanda. Mi no tin necesidad di mira e propiedad” e hues a bisa sinembargo. A purba mustra cu prueba di midimento, cuanto auto ta pasa ey dilanti, y cu un propiedad extra, sigur lo no ta un problema. 

TUR DOCUMENTO NA ORDO

E abogado a subraya for di comienso te final, cu contrario na e caso anterior (unda cu hues a prohibi e compania pa opera) na januari, tur documento pendiente, (cu excepcion di esun hotelero), ta na ordo, firma y entrega. 

ABOGADO SJIEM FAT

Abogado pa gobierno, Hans Sjiem Fat a cuminsa na mustra cu e ta den un posicion fastioso. Esaki pasobra su cliente ta dilanti di un situacion unda cu si e cumpli cu e peticion di e contra partido, si hues honra nan peticion, cu e lo ta violando e sentencia di e propio corte cu a sentencia nan na prome lugar. “Corte tin e chens awor di caba cu esaki y defini finalmente kico nos mester haci” e abogado a sigui bisa. A considera henter e defensa di su contra partido, como un simple ripitishon di e caso anterior, solamente den un diferente forma y porta mas ‘style’.