Xander Bogaerts ta luci den wega contra St Louis Cardinals

ST LOUIS – Xander Bogaerts di Aruba tabatin otro tremendo anochi, ora cu su actuacion den e wega contra St Louis Cardinals tabata determinante pa Boston Red Sox finalmente gana e wega 2 -1. Xander mes a bati di 3-1, di cual uno tabata un doblete den center field, y un otro un fly di sacrificio, generando e careda ganador. Pero Xander a luci mas ainda riba tereno den forma defensivo. Cubriendo short stop, e la sambuya pa gara un rolling den su direccion, tira esaki pa segunda, iniciando un double play tremendo. E siman aki Xander un biaha mas a luci grandemente, aunke cu su ekipo no ta den su miho momentonan. Porfin nan a gana nan di 50 wega, pero esey no ta suficiente pa yega unda cu nan tabata aña pasa, esta cu chens pa e titulo maximo. Asina mes Xander Bogaerts ta sigui marca su pasonan firme y sigur, cu ta haciele solamente mas stabil y sigur riba e roster di Boston Red Sox. Riba e imagennan por mira algun di e hugadonan di Xander Bogaerts durante e wega di diaranson anochi contra St Louis Cardinals.