Construccion di 'Smart Community Aruba' a cuminsa

ORANJESTAD - Despues di preparacionnan extenso, construccion di e bario na Kibaima cu ta consisti di viviendanan innovativo y sostenibel, 'Smart Community Aruba' a haya e señal pa start. Na Kibaima, e trabounan a cuminsa dialuna merdia den presencia di Prome Minister Mike Eman, Minister Benny Sevinger, Mike de Meza y directonan di FCCA y Caribbean Branch Office TNO, van Poppel y Ebbing cu ta bay guia e proceso di cerca. Presente tabata tambe directornan di ELMAR NV, WEB NV, ehecutivonan di SETAR, FCCA y un cantidad grandi di invitado. 

PROYECTO EXPERIMENTAL DI 20 CAS

'Smart Community Aruba', ta bira un proyecto experimental di 20 cas cu enfoke riba sostenibilidad. E bisindario ta bira un medio unda por desaroya, investiga, studia y bin cu solucionnan sostenibel basa riba condicionnan climatologico Caribense. E meta primordial ta desaroyo di conocemento relaciona cu solucionnan tecnologico di escala y modelonan comercial cu despues por wordo aplica riba henter Aruba y regionalmente. 

AREANAN DI INVESTIGACION SPECIFICO

Areanan di investigacion specifico ta: tecnologianan pa vivienda cu ta spaar energia, produccion descentralisa di energia solar y di biento, integracion di energia sostenibel den rednan electrico inteligente (Smart Grids), tratamento y reciclahe di awa y transporte (auto) electrico pa consumidor. Tambe ta bay tin un enfoke special riba e aspectonan humano relaciona cu tecnologia sostenibel.

DURACION DI CONSTRUCCION

Construccion di e bario innovativo aki ta bay tuma un periodo di mas o menos 11 luna. Durante e periodo aki FCCA ta bay busca y selecta huurdonan basa riba un perfil specifico cu a wordo desaroya pa e proyecto. Nan no mester unicamente di kier biba 'green', pero tambe mester ta dispuesto pa coopera cu e investigacion y e estudionan en general.