NoticiaCla.com awor cu 'livestreaming' riba Facebook

ORANJESTAD - Como otro servicio pa su lectornan, NoticiaCla.com for di diadomingo a cuminsa cu e servicio di 'livestreaming' riba su pagina di Facebook, tanto e version di papiamento como hulandes. Esaki ta nifica cu durante cierto evento, actividad y suseso noticioso, lectornan cu ta sigui NoticiaCla.com via e pagina di Facebook, lo mira esaki live (en bibo), pues e momento cu e ta sosode. E prome evento cu NoticiaCla.com a 'stream live', tabata parti di Fiesta Rotaria 2016 den oranan di atardi. 

MAS CERCA Y MAS LIHER PABO

Cu e posibilidad aki, NoticiaCla.com ta trece e noticia mas cerca di bo, mas bibo pa bo por wak e noticia mas liher y segun e ta sosode. Claro cu e pagina web ta sigui actualisa e noticianan segun e sigui desaroya. Facebook, despues di a experimenta e 'feature' aki riba su plataforma aña pasa, a limita esey inicialmente pa gruponan selecta. E aña aki Facebook a habri esaki pa tur hende. Como tal awor NoticiaCla.com tambe ta forma part di esnan cu ta livestream. E ta un posibilidad cu varios lugar na Aruba ya caba ta ofrece, manera algun radio emisora, gobierno, y cierto personalidadnan. 

CON PA WAK E SEÑAL LIVE RIBA FACEBOOK?

Cu su riba 8000 plus suscrito riba e pagina Facebook caba, awor cu e facilidad aki NoticiaCla.com ta sigur cu e cantidad di siguidornan lo sigui aumenta. E servicio aki no ta costa e suscrito nada extra, sino cu solamente e tin cu 'like' e pagina di NoticiaCla.com y/of NoticiaCla.com Nederlands, pa e haya e 'live streaming', of 'live video' aki. Esnan cu ya ta abona, ta haya e señal automaticamente caba. Pa haya e pagina, simplemente subi riba facebook y skirbi e palabranan 'noticiacla' of 'https://www.facebook.com/NoticiaCla/' .