Plasterk ta 'clarifica' diferencia di deficit di Aruba entre CBA y gobierno

DEN HAAG - E motibo cu tin un diferencia di splicacion di deficit di Aruba segun Banco Central y gobierno di Aruba a haya un splicacion. Por lo menos segun minister di Reino (Hulandes) Ronald Plasterk. Tabata den un carta cu Plasterk a contesta parlamentario Andre Bosman, el a duna e splicacion aki. "E diferencianan di cifra entre gobierno y CBA ta un fenomeno cu ta ripiti mas of menos", Plasterk a contesta. Y esey ta pone cu e cifranan ta diferencia di otro. E tabata contesta riba un pregunta specifico di Bosman 'pakico e cifra di deficit ta diferente entre CAFT, gobierno y gobierno.  

SPLICACION 'LOGICO'

Segun Plasterk, tin un bon splicacion di e 'diferencia'. "E diferencia de hecho por wordo splica for di e hecho cu e plachi financiero di pais Aruba (conforme e ley di comptabilidad) ta prepara a base di transaccion, y ta contene 'solamente' cifra di pais Aruba" Plasterk ta cuminsa na bisa. "Banco Central di Aruba (CBA) di otro banda ta prepara (su plachi financiero) a base di transaccion den efectivo, (sistema di caha). Esaki ta trata un bista consolida di entrada y gasto di gobierno hunto cu inversion di Fondo Desaroyo Aruba (FDA), mientras cu CBA ta uza su propio set di clasificacion financiero di gasto di entrada, cu ta desvia di gobierno". Como ehempel, Plasterk ta duna e pago di dividendo di e companianan di utilidad. "CBA ta 'reconoce' esaki na momento cu e ricibi esaki, mientras cu gobierno ta 'reconoce' esaki na momento cu e desicion cay durante e reunion di accionista pa paga (e dividendo). Asina e mandatario a purba splica e diferencia na e parlamentario Hulandes. 

DIFERENCIA CUESTIONA NA ARUBA TAMBE

Tabatin cuestionamento tambe na Aruba di con e cifranan tabata diferente entre CBA y gobierno y CAFT y con esaki tabata posibel.