Posibel acuerdo entre Reino y Merca pa combati criminalidad

DEN HAAG - " Na e momentonan aki, ta evaluando pa si den cuadro di cooperacion regional riba tereno conceto di combatimento di criminalidad, por cera un acuerdo entre Reino (Hulandes) y Merca". Asina minister Hulandes pa asuntonan di Reino (Hulandes) Ronald Plasterk a bisa Tweede Kamer den un carta cu el a manda siman pasa diahuebs. Kico esaki lo encera y pa ki tempo kier haci esaki, no ta conoci. E ta parti di un serie di topico cu e mandatario ta splica Tweede Kamer den e carta fecha 14 di april ultimo. 

REUNION JUSTICIAL NA ARUBA

Mientras cu pa Tweede Kamer y publicamente varios di e topiconan aki ta bin na cla pa prome biaha, e desicionan a wordo tuma for di comienso di aña aki durante e encuentro entre e ministernan di husticia di Reino na januari na Aruba (Justitieel Vierpartijenoverleg).  

PROPIO FINANCIAMENTO

E intencion ta tambe pa cada minister di husticia busca placa den su mesun seno, cu cual cooperacion cu otro por wordo financia. Atencion special ta poni riba e forma pa combati traficacion di hende y prostitucion.  

CONTAINER DI CEL

Tambe Plasterk a haci mencion di e acuerdo cu ta papia di reparticion di 33   containercel cu Aruba, Corsou y St Maarten lo haya di Bonaire entrante 2017. Hunto nan ta ofrece 84 lugar pa cera prisonero. Bonaire ta haya nan prison operacional e ora, pues no tin necesidad mas pa e containernan aki mas. Como tal Hulanda (minister di husticia Hulandes) ta ofrece esaki pa e tres otro islanan.