A rescata pareha riba un "Hobby Cat" tras di lighthouse

ORANJESTAD - Polis den fin di siman a rescata pareha riba un "Hobbycat" tras di Lighthouse. Diadomingo merdia pa mas o menos 11:50 am a drenta informacion cu tin un pareha riba un "Hobbycat" cu problema na altura di 500 meter pabou di Lighthouse patras di Malmok. Un señora a yama via telefon y tabata grita hopi, tabata masha histerico, pidiendo pa ayudo.

RESCATE MESORA

E unidad di Polis Maritimo a sali mesora cu un boto pa e sitio pa brinda asistencia. Na yegada na e sitio a constata cu e señora a haya un ataca y no por a move su mannan. E tabata cu un hende homber riba e boto, pero dor cu e señora a bira malo, nan no por a yuda otro y no por a nabega regresa tera mas tampoco.

AMBULANCE NA SITIO MES

Mirando cu e señora tabata malo, a pasa ambos den e Boto di Polis y cu urgencia a transporta ambos pa tera, na altura di Boca Catalina, unda Ambulance tabata sperando riba dje caba pa brinda asistencia medico. 

TRECE BOTO BACK TERA

Despues di a pasa e dama den Ambulance, a sali cu e meneer pa e boto y asina a trece bek tera. Di e forma aki Polis Maritimo a logra rescata ambos persona cu tabata disfrutando di e lama di nos isla, pero cu a bira malo y asina a haya ayudo mesora.