Buskeda pa 'Doei' Olario a intensifica den fin di siman

ORANJESTAD  - Diasabra for di 10:00 am a start un accion di buskeda masal pa e homber Prospero "Doei" Olario di 82 aña di edad, kende ta perdi desde algun dia caba. Pa 8:00 pm a para e accion, pero a continua riba diadomingo tambe, pero lamentablemente sin mucho resultado.

WAYACA PA PLAYA

E accion a cuminsa desde cas di e homber na Wayaca y a busca canando den direccion di Oranjestad. A busca tambe for di un adres na Zeewijk unda el a lanta direccion San Nicolas y a cana den centro di ciudad.

HOPI DEPARTAMENTO ENVOLVI

E accion a conta cu no menos di 16 Polis, 6 famia, Departamento di Slachtoffer Hulp, Cruz Cora, Search and Rescue Foundation Aruba riba lama y e Helicopter staciona na Renaissance Aruba. Tambe a uza Polisnan trahando riba nan warda regular den e varios areanan. Riba diadomingo a continua cu e buskeda for di 9:00 am y na e ocasion ey a aumenta e cantidad di Polisnan di 16 pa 24 agente, mas e otro instancianan cu ta yudando. A busca den area di Wayaca, Aeropuerto, area di Dakota, den Rancho, den caya Betico Croes y tambe na San Nicolas. A sigui te cu mas o menos 9:00 pm. Ta intencion pa dialuna mainta reuni cu algun departamento mas pa mira kico mas por haci ainda. A pidi tur patruya den districtonan pa ta mas atento pa e homber aki, den caso cu nan reconoce. Ta pidi comunidad pa duna un man dor di yama Polis na 100 den caso cu topa cu e meneer aki, cu probablemente a perde su caminda pa cas.