Parada cultural di lampi riba hotel strip a hala hopi publico

ORANJESTAD - Parada cultural di lampi riba hotel strip a hala hopi publico. Pa 6 aña caba Centro di Bario Brazil a bin ta organisa e parada cultural den e bario di Brazil, pero e aña aki a tuma e paso grandi di organisa esaki den e area hotelero pa mustra nos bishitantenan mas di e esencia di Aruba, e cultura y herencia di nos pais. Pa prome biaha sector hotelero a disfruta di un tremendo parada cultural for di RIU te na Paseo Herencia. Un parada cu a conta cu 17 grupo, varios banda tipico y sistema di zonido cu musica tipico unda un multitud grandi tabata presente pa sostene e parada y disfruta. Un parada di cultura grandi cu ta na honor di nos mama di cultura Bernadina Growell, q.e.p.d. 

ANOCHI CULTURAL

Despues di e parada a sigui un anochi cultural dilanti un publico masal unda Minister Otmar Oduber a hiba palabra. E mandatario a duna un palabra di pabien y gradicimento grandi na cada un cu a duna nan maximo esfuerso y contribucion entre otro Centro di Bario Brazil y Fundacion Bernadina Growell. Na gerencia di Paseo Herencia, Sr. Oduber a duna su palabranan di elogio y gradicimento pa tuma e curashi y brinda e oportunidad pa den sector hotelero, meymey di nos bishitantenan organisa e prome parada cultural den e area aki. Paseo Herencia ta fungi como lider den e sector priva pa a tuma e prome paso demostrando e potencial y poder di nos cultura, exponiendo esaki na nos bishitantenan.

EHEMPEL PA SOSTEN COMERCIAL

Mirando e exito di e parada cultural diasabra ultimo, ta spera cu esaki por fungi como ehempel pa tur otro den sector priva, forma parti como partner, envolviendo nan mes den un combinacion special di cultura y turismo. Locual a resalta ta e interes di e gran cantidad di hobennan presente, entusiasma di ta forma parti na e actividad cultural aki. Hopi tabata e chikitinnan cu a te hasta duna show dilanti e publico grandi presente, cu sigur a haya un hopi bon acogida. Tur e muchanan y hobennan aki ta motiva nos futuro generacion e importancia di salvaguardia nos cultura.

Minister Oduber cu un gran entusiasmo a anuncia, mirando e exito grandi aki, no por ta otro, cu e parada cultural den sector hotelero lo continua otro aña banda di esun den e bario di Brazil. Tabata un experiencia unico unda e turistanan tabata aprecia e trahenan folklorico y baila riba nos musica tipico. E mandatario a sigura cu por conta cu sosten tanto di dje, pero tambe di henter su ministerio pa sigui organisa parada cultural tanto den e area turistico como tambe den e cuna unda e la lanta pariba di brug.