"Operacion Cunucu" cu sterilisacion gratis pa cacho di caya otro siman

ORANJESTAD - Manera cu NoticiaCla.com a presenta como primicia algun siman pasa, e organisacion di boluntario di Merca,  Animal Balance ta mandando un ekipo di 20 profesional pa Aruba pa haci sterilisacionnan riba cacho di caya, garando y sterilisando e cachonan cu ta biba na e dump di Parkietenbos. Tur cacho cu ta wordo gara lo wordo hiba bek pa e mesun luga unda nan a wordo haya, unabes cu nan wordo sterilisa.

OPERACION CUNUCU

Mientras cu e enfoke principal di "Operacion Cunucu," ta pa gara e cachonan na e dump di Parkietenbos na un manera humano, bo por yuda bo bario tambe, door di trece algun di e cachonan cu ta biba riba bo caya, pa wordo opera.

SITIO DI CLINICA TEMPORAL

E sitio di e Clinica temporal lo ta Centro Dakota unda cu bo por trece bo cachonan di caya: Entre 8 am y 9 am. Mes momento ta anuncia cu e tempo di busca, despues di cirugia, lo ta pa 5 pm. E fechanan di e operacion aki lo ta 26 di april, 27 di april, 28 di april, 29 di april y 30 di april.

SAN NICOLAS

Pa habitantenan di San Nicolas tambe a corda. Si bo ta desea di trece un cacho di caya, di bo caya, pa wordo opera y treci bek, e organisacion tin un punto di coleccion pafo di YMCA, pa esnan cu no tin transportacion. Boluntarionan lo busca e cacho di bo na e punto di coleccion aki y regresa e cacho pa bo, e mesun dia, entre 5 pm y 6 pm.

ORANJESTAD

Si bo ta ta desea di trece un cacho di caya, di bo caya, pa wordo opera y treci bek, entrega nan na Centro Dakota; por fabor sigura cu e cacho ta riba un cabuya of den un kennel.

500 CACHO MAXIMO

E Clinica di Sterilisacion Gratis pa cacho y puppy di caya lo trata un maximo di 500 cacho y puppy pa e campaña di e aña aki. Tur cacho sterilisa lo ricibi Vacunanan Gratis contra Parvo y Distemper, y tratamento di prevencion di purga y carpata. Tur cacho lo ricibi un tattoo chikito den nan orea pa indica cu nan a wordo opera.

PLATAFORMA LEY DI CACHO

Plataforma Ley de Cacho ta den sosten completo di e campaña aki, y nan ta pidi cu si bo ta un doño di cacho, por fabor tene bo cacho riba bo propiedad, ya cu si nan gara bo cacho, e lo wordo sterilisa.

Adicionalmente, 40 boluntario local y internacional ta dunando di nan tempo pa sostene "Operacion Cunucu," den hopi otro manera pa sigura cu e campaña ta exitoso, y nos ta gradici nan.  

SOSTEN DI GOBIERNO

"Operacion Cunucu" tin e sosten completo y cooperacion di e Gobierno di Aruba y miembronan di Parlamento, specificamente e Minister di Husticia, e Minister di Infrastructura y e Minister di Salud. Un reconocemento special mester bai na Miembro di Parlamento Donny Rasmijn. 

SPONSORS

E proyecto ta den desaroyo ya pa dos aña, y a wordo haci posibel solamente door di e donacionnan sumamente generoso, di cual mayoria a bin di turistanan Mericano. E proyecto ta disfruta di e sosten di e NGOnan local, gruponan di Derecho di Bestia, e veterinarionan local y hopi negoshi local, cualnan a sponsor e acomodacionnan, lunchnan, cuminda di cacho y hopi mas.