A para contratista di coba cierto parti di Green Corridor

ORANJESTAD - Debi cu e contratista di Green Corridor a corta kabel di voltahe halto di coriente causando cu varios parti di Aruba no tabatin coriente, DOW y Elmar a dicidi cu ta para tur cobamendo cerca di kabel di voltahe halto pa evita problema. Por lo menos te ora cu Elmar caba drecha e kabelnan kibra. E ta costa hopi placa y kier evita cualkier problema atrobe cu por surgi. Ademas Jossy Kock di DOW a confirma cu e 'incidente' aki lo costa e compania Odinsa un multa. No ta conoci con halto e multa aki lo ta. 

PARO DI EXCAVACION

Segun Kock, e paro pues ta pa evita mas posibel interupcion di coriente, a pone e paro riba e 'excavacion'. "No mag tin ningun excavacion tumando lugar, si no ta Elmar mes ta haciendo esaki pa trabou cu mester wordo haci" Kock a bisa. Tambe di parti di DOW cu ta controla e si e contratista ta cumpliendo cu e regla, esey ta bay wordo mas mehora ora cu tin trabou tumando lugar na sitionan cu tin peliger di coriente. 

CONTRATISTA 100% RESPONSABEL 

E hecho cu atrobe a corta kabel, a surgi e pregunta cu si no ta indica e areanan cu tin kabel, si e contratistanan tin mapa y si nan tin nan, con bin toch e cosnan aki ta sosode. Kock a sigura cu Elmar ta uzando granito y ta pone un mantel cora pa indica cu tin kabel di alta tension coriendo eybownan. Den e caso cu a pasa cu a mishi cu e kabelnan principal, e contracto di PPP cu e contratista ta stipula cu e contratista ta 100% responsabel, pero e tin tambe proceso cu e no a sigui. Entre nan, Kock a confirma cu e contratista a pone hende traha na e sitio sin cu tabatin un persona di seguridad cu tin cu controla si tur cos ta bay conforme regla cu ta poni. 

MULTA PA CONTRATISTA

Pa loke ta multa cu e contratista mester paga, Kock a splica cu pa cada proceso cu no wordo sigui, e contratista ta haya 'boetepunten'. Cada punto tin su consecuencia pa e contratista, cu ta suma na placa cu e contratista lo no keda contento cune. Den e caso di diahuebs, sigur sigur Kock a bisa cu e contratista lo haya e multanan corespondiente. Mapa tambe e contratista tabatin. "E tabatin tur mapa, cu ta indica unda cu e kabelnan ta core" pues no ta cuestion cu a bay traha sin mapa of mapa bieu.  Tambe Kock a splica cu e compania tin cu produci un rapport awor unda cu ta indica kico a ocasiona e fayo, unda e proceso a bay malo y kico nan ta bay haci di nan banda pa esaki no sosode mas. E contratista awor pues ta den e proceso ey y lo tin cu entrega esaki proximamente na DOW. FOTO ta di archivo di NoticiaCla.com di dialuna ultimo ora cu siman a habri e contratista ta basha e prome parti di asfalt riba e Green Corridor.