Elmar: Kita coriente di cliente ta ultimo recurso

ORANJESTAD -  “Mi kier sigura comunidad cu nos punto di salida nunca ta pa corta coriente di ningun hende, ni di clientenan domestico pero tampoco di clientenan comercial. Esaki ta e ultimo recurso ora e debe acumula di tal forma cu e ta bira iresponsabel pa lag’e sigui subi”, asina Wanda Broeksema, gerente di e departamento di Servicio na Cliente na N.V. ELMAR a reacciona den un comunicado, riba declaracionnan di un restaurant local riba rednan social y den prensa.

KEHO DI E RESTAURANT PEANUTS

Tabata un dia prome cu e restaurant en cuestion, Peanuts, riba rednan social y den prensa a reacciona riba e situacion cu nan a haya nan aden ora cu segun nan version, Elmar a corta coriente di nan establecimento siendo cu nan tabatin tur nan recibonan na ordo. Y como tal, e 'incoveniencia' a pone cu nan tabatin algun ora sin coriente y e trato cu e trahadonan di e compania di electricidad a duna esnan di e restaurant. Elmar den un comunicado awe, mientras a pidi disculpa pa e loke a sosode, a refuta gran parti di e keho relaciona cu e.o. e tempo cu e restaurant a keda sin coriente. "Na prome luga nos ta lamenta masha e inconveniencia cu e negoshi a haya su mes aden. Tambe pa e hecho cu nan ta sinti cu nos empleadonan no a trata nan na e forma cu lo a desea. Na N.V. ELMAR ta trata diariamente pa por surpasa expectativa di clientenan, tanto na e nivel di distribucion como tambe pa e servicio cu ta brinda. Lo sigui haci tur esfuerso pa mehora e nivel di servicio mas ainda", e comunicado ta sigui bisa. 

DISCUTI CUENTA DI CLIENTE

Segun e compania, lamentablemente como compania N.V. ELMAR no por discuti cuenta di cliente den medionan di comunicacion, pero di otro banda e compania tin cu salvaguardia su reputacion corporativo y su sistema administrativo. " No mas cu algun luna pasa nos compania nacional di distribucion di coriente a lansa un sistema nobo, moderno y eficiente di cobransa, CIS, den cual awor tur luna e cliente tin un miho bista riba su consumo, riba su pagonan y riba locual ta habri pa paga ainda. Ta lamenta masha cu a cataloga e sistema aki di ta “ na werki “.

NO TA DESCONECTA SIN MAS 

E comunicado ta sigui mustra cu mester ta cla pa tur hende cu na N.V. ELMAR no ta desconecta suministro di coriente facil, pasobra mas coriente nos clientenan uza, mas entrada e ta pa e compania. N.V. ELMAR hopi biaha ta logra yega na areglonan di pago, loke ta haci regularmente cu clientenan cu haya nan mes confronta cu retonan financiero pa paga nan cuentanan atrasa di coriente. Pero, di otro banda N.V. ELMAR tin responsabilidad financiero pa cumpli cu ne tambe, cu ta rekeri cu cobransanan mester sali y cu mester cobra tambe. Y riba e tempo cu e restaurant a keda sin coriente, tambe e compania di electricidad a duna nan banda di medaya. " Pa loke ta e caso di interupcion di coriente riba dialuna, di cual e restaurant ta bisa cu nan a keda 4 ora sin coriente, mester informa cu den ambos caso e fayo tabata for di alcance di N.V. ELMAR y cu ambos biaha el a bay pa 20 minuut y no pa 2 ora manera ta sugeri", e compania a finalisa bisando.