Caso Magnus: A pidi 5 aña pa Pieter y 20 aña pa Damascus respectivamente

WILLEMSTAD — Fiscal Gert Rip diamars atardi a pidi 5 aña di castigo di prison pa Carlos ‘Kalo’ Pieter y 20 aña pa D’Angelo “Panchek’ Damascus respectivamente pa nan envolvimento den e caso di asesinato di Helmin Wiels. Pero mescos cu e sospechoso principal Elvis “Monster” Kuwas a haci riba e prome dia, e dos sospechosonan cu a sigui riba e di dos dia di e caso Magnus, Pieter y Damascus a nenga di ta envolvi den e morto di politico Helmin Wiels. Fuera di nenga envolvimento di morto di Wiels, Damascus a desmenti envolvimento tambe cu e morto di “Raul ‘Bolle” Martinez, cu a fungi como e chauffeur di e auto cu nan a uza pa huy despues di e asesinato.

Banda di nan envolvimento riba Wiels, e dos hombernan diamars a wordo acusa di ta envolvi den dos atraco arma; uno serca e negoshi di Hector Henriquez y uno riba un trahado venezolano di un tienda di paña. Henter e atardi, a bay den detayes di ken tabata conoce ken y kico cada un su trabou tabata. Tur a para ariba firme cu nan tabata conoce otro di cierto forma, pero no tabata envolvi den e caso Wiels. Prome mainta, a sigui cu e interogacion di Kuwas, ya cu esey no a termina un dia prome.