Polis y Warda Costa a efectua detencion peligroso riba lama

ORANJESTAD - Diaranson ultimo alrededor di 8:50am Steunpunt Aruba di Warda Costa di Caribe Hulandes a informa Polisnan Maritimo cu ta nota 5 boto piscando ilegal den awanan teritorial di nos isla, na un distancia di mas o menos 9 miya zuid di Savaneta. 

AYUDO POLIS MARITIMO 

Tendiendo cuenta e cantidad di botonan piscando, a solicita ayudo di Polisnan Maritimo pa sosten. Na e sitio Warda Costa a manda nan helicopter cu a duna indicacion di algun bulto. A constata cu e bultonan mas bien tabata palambranan cu ta uza pa piscamento comercial. 

DETENCION DIFICIL 

E accion a conduci cu a logra para 2 di e botonan Venezolano piscando den nos awanan teritorial. Mester menciona cu e detencion no a bay facil, pasobra na momento cu e personal di Warda Costa y Polis a bay aborda un di e botonan procedente di Venezuela, un di e tripulantenan a basha gasolin riba su curpa y despues a purba muha e representantenan di ley cu gasolin. Na un forma tactico autoridad local a logra domina e situacion riba boto y evita un desgracia.

CANTIDAD DI PISCADO DETENI

Na tur a detene 5 persona abordo di e dos botonan piscado. A transporta tur pa e base di Warda Costa na Savaneta na unda Sub Fiscal a ordena nan encarcelacion pendiente e proceso penal cu a inicia. A tuma e palambranan y tur e piscanan den beslag. Despues a dicidi di deshaci di e piscanan pasobra mientrastanto nan a daña.

PREPARA PA CUALKIER EVENTUALIDAD

Di e forma aki por nota cu no tur ora e detencionnan riba lama ta bay facil y hopi biaha ta pone bida di e funcionarionan di Polis y di Warda Costa na peliger. Pero nan preparacion y determinacion pa defende nos leynan a pone cu ta surpasa tur reto y obstaculo den nan esfuerso pa aplica nos leynan.