Den futuro porta, pero awor RIU no tin pensa pa expande na Aruba mas

ORANJESTAD - Mientras cu nan tin interes pa expande nan propiedadnan si, por lo pronto sinembargo RIU Hotels no tin pensa di haci esaki. Gerente regional di e cadena hotelero Spaño, Daniel Camponovo a mustra cu cualkier expansion lo keda pa futuro. Actualmente nan ta masha contento cu e presente dos hotelnan, y sigur pa loke ta e cantidad di turista cu nan por a hospeda den nan hotelnan. Te awor, cos ta bayendo bon pa RIU na Aruba" Camponovo a bisa NoticiaCla.com e siman aki. Camponovo tabata presente pa presenta e sosten na tres NGO na Aruba. 

ACTUALISA ACCIDENTE DI BOILER ROOM

Camponovo a probecha pa actualisa e situacion di e accidente cu a surgi luna pasa ora cu tabatin un candela den e boiler room na Riu Palace. "Nos tabata cera pa 6 pa7 dia, pero a habri caba pa negoshi" Camponovo a bisa, refiriendo na e accidente ey. "Nos ta completamente bendi pa e temporada (di invierno), y pa henter resto di aña nos ocupacion (di hotel) lo ta hopi halto" Camponovo a sigui bisa. 

EXPANSION DI RIU NA CAMINDA?

"Nos no tin nada na mente aworaki" Camponovo a bisa, refiriendo na posibel plan pa expande e presencia di RIU na Aruba. El a referi si na e intencion di purba expande nan presencia cu loke mester a bira compra di loke awe ta Hilton Aruba Caribbean Hotel. "Nos ta hopi contento cu e dos hotelnan cu nos tin. Nos ta bayendo fabuloso, hopi trabou si". Y ta akinan cu el a duna indicacion cu no ta deshaci di e plan pa atrobe expande nan presencia na Aruba. "Ohala den futuro nos por reinverti nos beneficionan riba e isla, y no otro caminda", Camponovo a bisa. Si esey sosode, e lo kier tin'e na un otro localidad. Riba e pregunta cu si lo kier traha un hotel acerca of simplemente cumpra un propiedad existente, Camponovo a mustra cu e no por bisa awor. "Porta, e momento aki nos no sa. Pero tur cos ta posibel. Aworaki nos ta concentra riba negoshi cu nos tin y no ta buscando otro" Camponovo a finalisa bisando.