ABC a duna PGM Condobuilders 3 dia pa para fase 2 di Blue Residences

ORANJESTAD - Aruba Birdlife Conservation (ABC) a duna e compania responsabel pa construccion di un di dos fase di e proyecto Blue Residences, un periodo di 3 dia pa boluntariamente para e proyecto. Si esey no sosode, ABC 'lo contempla e proximo paso', e presidente di ABC esta Greg Peterson a sigura NoticiaCla.com e siman aki durante e noticiero 'NoticiaCla.com merdia' na Power FM. Segun Peterson, nan ta dirigi nan mes na e compania pasobra asina e proceso ta. Si e compania keda perhudica, nan tin cu bringa esaki despues cu gobierno cu ta esun cu a otorga nan e permiso. 

CONSTRUI RIBA TERENO BERDE

Manera ta conoci, pa algun siman caba ABC ta riba e asunto aki, despues cu a bira conoci cu e tereno eybanda, dilanti di Divi Phoenix a keda rosa pa un proyecto hotelero di 3 strea. E problema ta cu segun ABC esaki a sosode riba un tereno cu ta designa como tereno 'berde'. Pero e departamento di gobierno DIP (Directie Infrastructura & Planificacion) a 'coregi' ABC su ponencia, indicando cu e tereno en cuestion no ta uno berde sino apto pa desaroyo turistico. ABC ta cuestiona esaki ainda y a reta DIP pa bin cu un splicacion miho. 

TERENO BLUE RESIDENCES

Basa riba esaki a bay check otro areanan y a bin descubri cu mientras cu e tereno riba cual e proyecto di Blue Residences ta uno pa desaroyo, esun banda di dje cu tambe ta di Blue Residences, si no ta uno destina pa desaroyo y ta marca claramente como uno berde. DIP no a reacciona riba esaki ainda riba peticion di NoticiaCla.com y a keda di check e informacion pa wak kico ta corecto den e caso aki. Te ainda esey sinembargo no a sosode. 

TRES DIA PA PARA PROYECTO

Mientrastanto ABC a tuma pasonan caba pa atende cu e asunto directamente cu e compania, cu segun ABC su investigacion, ta uno Venezolano, PGM Condobuilders NV, y ta trata di un tereno otorga di 17.756 m2. ABC diaranson a manda e carta pa e compania aki cu e peticion pa 'boluntariamente' para e proyecto aki, pendiente un investigacion. E tempo cu ta duna nan, ta 3 dia cu ta cuminsa core asina cu e carta wordo ricibi pa e compania. Segun Peterson, e carta a bay diaranson y si nan a ricibi'e diaranson, esey ta nifica cu pa diasabra e tempo duna, ta vence. 

ABC TA CUESTIONA DIP

ABC ademas a mustra cu e tereno en cuestion a wordo otorga mitar di aña pasa na juli como erfpacht. E pregunta cu ABC tin pa DIP, ta cu con e ta bisa cu e tin cu 'investiga e caso' siendo cu nan a otorga esaki caba na e  compania. "Por ta cu DIP no a worry pa check e status ROP (Ruimtelijke Ontwikkelings Plan) prome cu a firma esaki pa erfpacht?" Peterson ta puntra. "Of si esaki ta nifica cu DIP tin un problema pa admiti awe cu e tereno en cuestion tin un designacion 'berde no comercial'"? Den cuadro di esaki, ABC a haci DIP un serie di pregunta publicamente  pa contesta. No ta conoci pa NoticiaCla.com si DIP a contesta esaki of tin pensa di contesta esaki.