Investigacion interno di casonan di fraude na D.O.W.

ORANJESTAD — Tin un investigacion interno andando den Dienst Openbare Werken (DOW) pa fraude. Trahadonan di e departamento lo tabata, -contra pago-, pa añanan largo aproba mapa di construccion of traha mapa pa construccion cu despues nan mes tabata aproba.  

TRAHADO SUSPENDI Y RETIRA 

Segun minister di infrastructura Benny Sevinger tin algun trahado cu ya ta suspendi caba y un of dos lo a wordo kita caba di trabou. E director di DOW Marlon Croes a sigura cu dentro di algun luna e investigacion lo termina.  

TEMPO DI INVESTIGACION

Con largo e fraude ta tumando lugar y con grandi esaki lo mester ta, Croes no kier a bisa. Segun minister Sevinger, ta masha tempo tin storianan coriendo rond cu ,-contra pago-, mapa di construccion pa edificio por a wordo aproba. Ademas ta bou di tanto su periodo como minister y ministernan prome cu ne cu DOW ya caba a haci investigacionan interno relaciona cu fraude cu mapa di construccion segun Sevinger. 

INVESTIGACION FRECUENTE

Segun Croes (director Dow:red), e ta papia di un investigacion den e proceso pa entrega di permiso dentro di DOW, den concordancia cu e personal. Sevinger ta persisti cu e tipo di investigacionnan aki tin cu tuma lugar cu frecuencia, pa por mantene integridad di e departamento na halto. Pa cu rumor cu un instancia Hulandes ta envolvi cu e investigacion, e mandatario a bisa di no ta na altura di esey. 

 Autor:  Ariën Rasmijn Foto: Ariën Rasmijn  Caribisch Netwerk