Oficina representacion Hulandes ta condena vandalismo cometi

ORANJESTAD - "Representacion di gobierno Hulandes na Aruba a entrega un keho cerca polis". Asina e representante di gobierno Hulandes na Aruba, Tanja Timmermans a reacciona pa NoticiaCla.com riba e caso di vandalismo riba nan edificio/oficina awe marduga.  Awe mainta ta nan edificio di VNO (Vertegenwoordiging van Nederland op Aruba) a lanta mainta afecta pa e 'campaña di graffiti', cu e palabra 'pedofiel' como e centro di atencion. Cu e entrega di keho, awor ta keda na autoridad pa investiga 'un ke otro'. 

MAS CU SOLAMENTE GRAFFITI

Mientras cu VNO ta un mas di esnan afecta pa e racha di vandalismo  di graffiti, e biaha aki e destruccion no a keda solamente na graffiti, sino tambe bentana kibra. Timmermans a confirma pa e portal aki cu fuera di graffiti, tabatin dos bentaha cu a keda destrui cu un bloki. "A haci denuncia, y e investigacion di polis y husticia na hechos y circumstancia mester contesta e pregunta di ken e autor ta y e motibo di e accion" Timmermans a sigui bisa.  

DIALOGO RESPETUOSO

Ademas segun Timmermans, 'Representacion (VNO) ta habri semper pa un dialogo respetuoso cu tur esnan den comunidad di Aruba. E accion aki no ta crea ningun contribucion significativo, y ta merece como tal e condena di mayor calidad posibel". Ademas VNO ta sigura cu en caso gara e autor(nan) y cu nan wordo sentencia, VNO lo cobra e autornan e daño causa. 

AUTOR 

Pa un periodo largo tin e serie di actonan di vandalismo di graffiti primordialmente, unda cu un persona publicamente a admiti di ta esun responsabel pa e actonan aki, y e siman aki ainda a admiti esaki durante un conferencia di prensa. E persona aki, Reginald Danies, ta buscando confrontacion cu husticia pa e por bay cera y posiblemente logra un intercambio di palabra cu esnan di husticia pa 'maske ta asina logra atencion pa su caso'. Ta trata di un caso di un aña bieu di acto sexual cu un menor di edad (den e caso aki, su yiunan), pa cual e persona aki a tuma riba su mes pa cuminsa un campaña di pinta graffiti cu e palabra clave di pedofiel pa haya atencion. Recientemente e caso aki a bolbe lanta ora cu e ciudad a lanta cu varios area pinta cu e graffiti aki. E cabay blauw, muraya di scol, e borchi di ILOVEARUBA, y awor e oficina di VNO.