Dianan gratis di parkeer a costa riba 75.000 florin

ORANJESTAD - E 9 dianan cu gobierno a 'regala' pueblo di Aruba na december pa no tin cu paga pa parkeer na Playa, tabatin su costo: algo mas cu 75.000 florin. E recibo a keda presenta na gobierno di Aruba recientemente. Parlamentario di fraccion di MEP Dangui Oduber cu a mustra e recibo, a critica cu e  recibo presenta ta muestra cu loke gobierno a haci mas bien ta un show siendo cu ta pueblo mes tin cu paga esaki. Director di Aruparking Teo Croes  sinembargo a splica NoticiaCla.com cu a simplemente cumpli cu e palabracion entre gobierno y Aruparking. A uza e practica di e dicho hulandes, vestzak broekzak esta di un saco pa otro saco den e mesun compania. Den caso aki di un compania di gobierno pa gobierno mes, cu ta mas bien un transferencia di placa. 

GOBIERNO A HACI PURO SHOW SEGUN MEP

Segun (Dangui) Oduber, e ta yama loke a sosode na december, 'henter un show durante rueda di prensa caminda Mike Eman a duna 9 dia di parkeo gratis'." Kico ta resulta awe, ta pueblo mes a paga pa e dianan aki pasobra awor Aruparking (Otmar) a manda cobra Mike Eman 75.000 florin pa pueblo paga! Esta haci fiesta cu placa di pueblo!" Oduber a bisa. Pues segun Oduber, nada gratis e gracia aki a resulta pasobra na fin di dia, ta pueblo mes ta paga pasobra e ta sali for di saco di gobierno cu de facto ta saco di pueblo. Pues no ta nada gratis e gracia aki a sali. 

ARUPARKING SU SPLICACION 

Di parti di e compania, Teo Croes como director di Arubus cu ta compania madre di Aruparking a reacciona cerca NoticiaCla.com tambe. Pa Croes, e ta algo hopi simpel:" Gobierno a dicidi cu lo duna e dia nan liber y cu lo paga Aruparking e 'mindergenote inkomsten' basa ariba e entrada pa dia di Aruparking" Croes a bisa. Mas aleu Croes a splica cu esey ta simplemente nifica cu " Locual nos no a genera, gobierno a bay accoord pa pag'e". Y den cuadro di esaki, a manda un recibo segun palabra unda cu gobierno lo paga e suma di AWG 75.492.00 na Aruparking pa e 9 dianan cu gobierno a 'regala' pueblo di Aruba. 

OPERACION VESTZAK BROEKZAK

E splicacion mas aleu a bin indicando cu e loke cu (Dangui) Oduber ta bisa, no ta completamente corecto. De hecho, ta consider'e como un locura. Loke a sosode segun a splica NoticiaCla.com, ta cu e suma a wordo acorda, y a cubri e 'buraco' cu e dianan aki a genera pa e compania. A splica cu e compania no ta un instituto filantropico sino un negoshi cu tin cu genera placa. E ta un compania di gobierno cu awor tin un buraco cu mester wordo yena. Si gobierno no paga esaki awor, despues e tin cu paga e suma toch den forma di subsidio, pues con cu para bira, e mester wordo paga di un forma. Esaki sinembargo lo keda un discusion den comunidad dependiendo cu ken bo papia. E hecho cu ta placa traspasa di un compania di gobierno pa un otro, ta papia e ora di e operacion vestzak broekzak, esta ta traspasa placa practicamente di un 'departamento' pa un otro 'departamento' den e mesun compania, cu den e caso aki ta gobierno di Aruba.