George Jamaloodin: Mi a wordo tortura den cel na Barber

WILLEMSTAD – “Mi a wordo tortura den prison na Barber” ta palabranan di ex minister George Jamaloodin algun rato despues cu e la recobra su libertad na Corsou. E la opta mesora pa bay den un entrevista na radio Mas pa splica su situacion di e ultimo dos siman cu e tabata sera. Segun Jamaloodin, e no tin ni tabatin nada di haber cu e caso Wiels. Pesey e tabata sa cu tardi of tempran e lo a recobra su libertad. “Redo no por surpasa e berdad” Jamaloodin a sigui bisa. Segun e ex mandatario, hendenan di Recherche Samenwerkings Team a purba intimide y kibre ora cu nan a hinke den e celnan na Barber. “Esey nan ta purba haci cubo. Si nan hibabo Barber, ta pa nan torturabo”.

Nan tabata psicologicamente tortura Jamaloodin segun su version, y e ta sigura cu tin tur cos graba riba video, con RST tabata haci esaki durante e periodo di su detencion. E la laga sa tambe cu e no ta laga cos para aki. Pasobra un di e consecuencianan ta cu e la perde hopi placa ora cu e tabata den prison. Contracto, trabou etc tur a pone cu e la perde esaki. “Cos no ta keda aki”. E la indica cu lo bay tin danjo y recompensa pa cobra despues. Pasobra bo no por detene hende y perhudica nan asinaki” Jamaloodin a laga sa.

Un rato despues, su ruman Amparo dos Santos a haci algun declaracion den direccion di e actual ministernan. Segun dos Santos, mester coi tur esnan den gobierno sera pa un of dos siman. “Haci esey y mesora bo ta soluciona e caso Wiels” dos Santos a sigura e locutor Morgan Isenia, cu tabata esun cu a entrevista tanto Jamaloodin como dos Santos.