Baby Lunah ta bek na Aruba!

ORANJESTAD - Exactamente dos luna despues cu el a bandona nos isla pa busca su salud den exterior, e criatura cu a gara curason di tur Arubiano y esnan cu conoce su caso, baby Lunah ta bek na Aruba. E mayornan a confirma na NoticiaCla.com cu baby Lunah a pasa su prome anochi satisfactoriamente bek na cas. Dialuna atardi nan a bolbe Aruba y awe mainta e mama Liandha felismente a raporta cu 'e prome anochi tambe el a pasa bon, danki Dios!". 

LUZ BERDE PA BIAHA

Dialuna porfin a haña luz berde pa e baby bula pa Aruba, ora cu a keda cla cu tur preparacion. Hopi tempo di anticipacion e mayornan no a haya, ya cu ta apenas 45 minuut prome cu nan mester a wordo recogi na clinica nan a wordo informa di esaki. "E buelo a bay bon. Lunah a drumi mayoria di e buelo y a keda stabil" e mama a relata contento na NoticiaCla.com. E trabou awor ta na Aruba pa baby Lunah sigui su proceso di recuperacion y pa mantene stabil. 

PREPARACION PA BOLBE ARUBA

Tabata diabierna cu NoticiaCla.com a bin cu e primicia cu preparacionan tabata andando pa e popular baby Lunah bolbe Aruba atrobe.  

E situacion medico di baby Lunah tabata di tal forma cu e ta wordo permiti pa bula caba y sigui su tratamentonan pa awor for di Aruba mes. Inicialmente e intencion tabata pa unabes na Aruba, e drenta hospital bek pa disgustuma e di e oxigeno cu ainda e ta un tiki riba dje. Pero debi na un "zwarte griep" (pest epidemie hopi pisa y cu ta wordo contagia hopi facil) outbreak den hospital, a opta pa haci esey na cas mes pa no expone na e risico di gara e virus aki den hospital innecesariamente, paso Lunah ta keda un baby delicado.

BULA BAY COLOMBIA

Tabata e di dos siman di februari cu e mayornan a bula bay Cali Colombia pa busca un miho salud pa nan baby. Un siman despues baby Lunah a opera y for di e momento ey e salud di e baby tabata mehora tur dia. Esey a sigui, aunke logicamente tabatin e retonan cu cualkier baby delicado ta encontra na caminda. Pero awor, baby Lunah ta suficientemente stabil cu e por biaha y pa e momentonan aki sigui wordo controla y trata na Aruba mes.

CONOCE LUNAH

Lunah a nace 3 di december 2015. Algun dia despues (9 di december) a bin constata cu e tin un VSD (AVSD) grandi (buraco na curason y su hartklepjes ta mustra di ta mas diki cu normal). Na hospital nan a dun'e oxigeno pa un periodo cortico y medicamento pa su curason. Despues di tres siman a haya resultado cu probablemente Lunah tin "Trisomie 18". E asina yama "Edwards Syndrome". Bukinan y estadistica ta indica cu e expectativa di bida di un baby cu Trisomie 18 ta hopi chikito. Door di e espectativanan aki e trend di cuido cu ta wordo ofreci ta limita, pero cu e añanan esaki a bin ta cambiando.

RESEARCH NOBO

Research nobo ta demostra cu muchanan cu Trisomie 18 tin un chens pa un bida mas largo y comfortabel si brinda nan e trato medico necesario y cu e revolucion di medicina tin pa ofrece awo. Tambe cu e cambio di mentalidad y cu tratando cada caso riba su mes y no generalisando, mas mucha cu e syndrome aki ta surpasando espectativanan di e estadisticanan. Lunah keto bay ta un ehempel bibo di esaki, ta un baby felis y ta demostrando cu e kier biba!