Cancelacion Pullmantur lo reduci crecemento cu 4% so

ORANJESTAD - E reduccion den bishita di e bapor crucero di Pullmantur na november proximo, lo reduci e cantidad di crecemento di turismo crucero cu 4%. Segun e mandatario di turismo Otmar Oduber a confirma na NoticiaCla.com siman pasa caba, cu 'nos lo no crece mas e aña aki cu rond 10% sino rond di 6%". Recientemente e crucero Pullmantur a anuncia cu entrante november 2016 lo cambia su itinerario y lo no inclui Aruba ni Corsou mas den nan ruta. 

MOTIBO DI CANCELACION

E decision aki a bin debi na e complicacion economico na e region Latino Americano, en particular na e paisnan Venezuela y Brasil. Ambos mercado tabata genera un cantidad importante di pasahero pa e linea di crucero aki cual recientemente a baha significantemente pa motibo di e dificultadnan economico. Aruba semper a sa di score bon cu e pasaheronan di Pullmantur y tabata y ta mira como un destinacion atractivo pa nan, pero situacion politico y economico ta afecta ambos pais na es momentonan aki cu na su turno a pone cu a introduci cambio di parti di Pullmantur.

KIER REEMPLAZA E CRECEMENTO AKI

Aruba Tourism Authority conhuntamente cu Aruba Ports Authority y Ministerio di Turismo a duna e noticia aki tur atencion segun un comunicado cu nan a manda dialuna indicando cu nan ta trahando pa reemplaza e reduccion aki. Debi na naturalesa di e industria crucero cu ta planea y bende cu adelanto di un aña of mas ta haci tur posibel pa compensa esaki den 2016, pero ta mira mas realistico aña 2017 en adelante. Esfuersonan ta inclui un cooperacion estrecho cu otro destinonan den e region manera Corsou, Colombia, Republica Dominicana y Panama pa crea ofertanan mas fuerte pa e lineanan di crucero.

REDUCCION DEN CIFRA

Cu e reduccion adicional aki, Pullmantur lo cambia di 58 calls pa 2016, pa 31 calls pa Aruba. Esaki ta un reduccion di 27 calls pa 2016 cu ta representa alrededor di 54,000 pasahero. Apesar di e reduccion aki, segun un comunicado di oficina di turismo, e proyeccion pa 2016 ta sigui positivo cu un crecemento anticipa alrededor di 5.6% compara cu 2015. E resultadonan di e prome 3 lunanan ta indica un crecemento fuerte cu 30.5% (64,854 pasahero adicional) compara cu e promer 3 lunanan di 2015, mientras cu e cantidad di calls a crece cu 21.1% (24 calls adicional).