Contratista a ranca kabel di coriente causando interupcion

ORANJESTAD - Tabata pa exactamente 1.37 pm cu e prome yamada a drenta na N.V. ELMAR notificando cu gran parti di Oranjestad ta sin coriente. Mesora tecniconan a sali pa e substation situa na Sabana Blanco y eynan por a constata cu un di e transformernan grandi tabata for di servicio, o sea tabata “uitgeschakeld”. 

CONTRATISTA TIN CULPA

A bin resulta cu e contratista cu ta cobando pa WEB Aruba N.V. na altura di e crusada di Mahuma, a ranca un kabel cu ta core entre WEB Aruba N.V. y N.V. ELMAR sin por yuda. Tambe a ranca un kabel fibra optico di N.V. ELMAR. Tecniconan cu a bay mira locual tabata pasando na e sitio di construccion na Mahuma a consta cu te ainda ta solamente e tubo a ricibi daño y te unda cu por a mira e kabel no a sufri daño. 

RECONECTA DEN TEMPO RECORD

Mientras cu un ekipo tabata na e sitio di construccion pa mira e daño, otronan tabata den e substation pa reconecta suministro di coriente mas lihe posibel, adaptando un ke otro. Pa 2:00 pm tur hende a haya coriente bek. 

AREANAN AFECTA

E areanan cu a resulta afecta dor di e fayo di contratista di WEB Aruba N.V. tabata Oranjestad, Sabana Blanco, Primavera, Cumana, e area rond di Renaissance Resort, Mall & Casino y Royal Plaza Mall. Danki na e hecho cu tecniconan a actua hopi lihe por a reestablece coriente den tempo relativamente corto.