DCA a ground e avion di Tiara Air brevemente pa algo 'corectivo' awe mainta

ORANJESTAD - Un rato despues cu e avion di Tiara Air a aterisa na Aruba despues di su prome buelo pa Corsou, a bira conoci cu Directie Luchtvaart Aruba a 'ground' e avion pa algun asunto 'corectivo'. Mesora NoticiaCla.com a papia cu e autoridadnan competente cu a confirma cu enberdad a ground e avion, pero brevemente y no pa algo di safety. "Ta cuestion cu mester a ahusta un aparato cu mester ora cu ta bula den destinacionan cu tin radar. A coregi e situacion caba y pa atardi e avion por a reanuda su buelonan" tabata e informacion confirma cu NoticiaCla.com a haya. Pues no ta un situacion di gravedad y e no a causa problema pa e compania. Mirando cu no tabata trata di algo di seguridad, a permiti e avion lanta buelo for di Corsou pa Aruba, pero na Aruba si e avion mester a stop di bula te ora cu a coregi e asunto menciona. 

TUR COS NA ORDO

A compronde cu tur otro cos tabata bon y cu no tin ningun otro problema cu e aerolinea y cu por bula e avion cu tur confiansa. De hecho a compronde cu e demanda pa buelo cu e compania ta grandi. A nota un entusiasmo grandi den e personal, y esnan cu a experencia e prome buelo, a nota un profesionalismo grandi den specialmente e capacidad di e tripulacion ora cu e avion a baha na Corsou awe mainta. Aparte di esey, a nota un alegria grandi entre e personal di cabina (flight attendants) cu tabata hopi servicial.