Tiara Air a 're-inicia' su operacion dialuna mainta

ORANJESTAD/WILLEMSTAD - Exactamente 10 aña despues cu e aeroliña a cuminsa bula na Aruba, Tiara Air a reanuda su operacion oficialmente dialuna mainta cu un buelo pa Corsou. E mesun forma cu Alejandro Muyale, -CEO di Tiara Air- , a haci segun e mes a conta NoticiaCla.com durante un combersacion na Corsou. Muyale ta yam'e un 'reinicio' di e buelo. Recordando e tempestad cu e aeroliña a pasa aden for di 2013, y cu tur loke a haci despues, Muyale a mustra un satisfaccion cu e compania awe ta bula atrobe. 

TEMPESTAD

Muyale ta conciente di e tempestad cu e compania a pasa aden, pero ta reconoce e trabou duro tambe di su hendenan cu a kere den dje, cu awe e ta bulando atrobe. E no tabata facil, mirando cu recientemente ainda durante un buelo di prueba, e compania a hay'e cu un incidente no desea ora cu e tire di e avion a rementa riba pista durante un aterisahe. Awe esey ta repara y cos ta ok atrobe. 

RUTANAN 

E buelo comercial di dialuna mainta ta uno diario entre Aruba y Corsou, y lo continua pa e proximo dos lunanan. Mes momento a anuncia e aliansa nobo cu tin entre e compania di Aruba y e compania Venezolano Avior Airlines cu lo permiti e dos aeroliñanan aki hunto ofrece un network interesante. "Buelonan cu mucho mas destino cu lo duna e clientenan hopi mas pa ofrece y destinonan cu nan por conecta cu ne" Muyale a sigui bisa. 

PLAN STRATEGICO

Como parti di e plan strategico y comercial pa 2016, e aeroliña ta anuncia un cambio di flota unda cu a planea pa na juni/juli di e aña aki incorpora 4 avion tipo fokker 50 cu lo wordo uza pa cubri rutanan den Caribe. Muyale a gradici tur esnan cu a sostene e compania tur e tempo aki, y particularmente na Corsou cu tin su oficina di benta na aeropuerto mes hunto cu Avior Airlines. E numbernan a keda mescos, pa Aruba 58tiara, y Corsou 5831113 y e portal di e compania www.tiaraair.com.