E di 27 'Conferencia Anual de Turismo Aruba' ta cuminsa awe na Aruba

ORANJESTAD – E siman aki ta bay tuma luga e di 27 edicion di e conocido encuentro ‘Conferencia Anual de Turismo Aruba’ –CATA-. Pa e motibo aki Aruba Tourism Authority ta yama bonbini na tur e participantenan. En total e encuentro ta conta cu mas cu 100 participante di diferente paisnan di Latino America, cu ta Colombia, Argentina, Chile, Brasil, Paraguay, Peru, Bolivia, Panama, Venezuela, Mexico, Suriname, Uruguay y Ecuador. E participantenan lo consisti di tour operators, representantenan di aerolinea, hoteleronan representando Aruba den e mercado y representantenan di Aruba den e mercado di Latino America y miembronan di prensa.

CATA su obhetivo ta pa brinda posibilidad pa reforsa e conocimento di Aruba na e ehecutivonan y pa sigui traha riba e relacionnan cu e socionan, enfocando asina riba oportunidadnan cu por enrikece nos mercado turistico.

FECHA DI EVENTO

E conferencia ta tuma luga for di 11 di april te cu 15 di april cu un programa intensivo. Diamars den dia lo inicia cu inspeccion na diferente hotelnan. Anochi lo tuma lugar e apertura oficial cu palabra di bonbini di Ministro di Turismo Sr. Otmar Oduber y di CEO di A.T.A. Sra. Ronella Tjin Asjoe-Croes. Diaranson mainta lo tin diferente presentacion como tambe exposicion. Ademas lo tin un presentacion di Profesor Sr. Carlos Rosales cu ta hiba e titulo ‘La Felicidad como herramienta de Ventas’. Parti merdia e grupo tin e oportunidad pa conoce nos caya grandi y pa tuma nota di e embeyesimento y remodelacion cu a tuma luga den e centro di nos ciudad. Tambe nan por bishita nos museonan.

VITRINA TURISTICO

Diahuebs henter dia lo tuma lugar e vitrina turistico. Akinan ta caminda encuentronan importante entre socionan local y e participantenan ta tuma luga pa asina negocia y amplia oportunidadnan pa e proximo temporada.

MERCADO PA ARUBA

Latino America ta e di dos mercado di mas grandi pa cu turismo di Aruba. CATA sigur ta un encuentro di suma importancia pa nos industria turistico. Aruba Tourism Authority ta desea tur participante hopi exito y ta desea nos huespednan un dushi y productivo estadia na Aruba.