Encuesta di KvK cu sentimento mixto pa parkeermeter

ORANJESTAD - Un encuesta conduci pa Camara di Comercio luna pasa riba e operacion di parkeermeter, a produci un serie di punto interesante. Entre nan, cu mientras cu un gran parti di esnan encuesta (62 negoshi cu ta representa 1107 trahado) no ta contento cu e binimento di e parkeermeter, nan ta acepta cu 'e situacion di parkeer a mehora'. De hecho, 54.1% ta kere cu ta mas facil pa haya un lugar di parkeer. Di otro banda, 89.5.% (mayoria riba e pregunta specifico) no ta satisfecho cu e proyecto di parkeer. Algo cu por zona contradictorio, pero den e serie di pregunta y contesta, e ta wordo clarifica.

ENCUESTA VIA E-MAIL

Mas den dia NoticiaCla.com lo presenta e resultado completo, pero pa awor ta importante pa nota cu a contesta mayoria di pregunta y te hasta a duna un serie di sugerencia di cual mayoria encuesta a bay di acuerdo y a uni nan mes na esey. E encuesta tabata pa medio di un 'email blast' (un email manda den un solo tiro pa un grupo grandi di persona/negoshi), unda cu e cantidad di negoshi cu a contesta pues tabata 62, representando gran parti trahadonan cu ta gana salario minimo of menos. 

ACEPTACION ABOU PA PERMISO DI PARKEER 

Di e grupo total di 1107 trahado encuesta, solamente 183 (di e total di 1107) a adkeri un permiso mensual pa parkeer, di cual KvK ta deduci cu tin un aceptacion hopi abou di e trahadonan pa parkeermeter pa uza e permiso ofreci. Esnan cu no ta uza e 'oferta', a haya un otro solucion sea di e doño di trabou, of ta wordo hiba y treci pa evita di tin cu paga. Otronan ta opta pa para mas leu djies pa nan no tin cu paga pa parkeer.  

SITUACION PARKEER MEHORA

Ta parce di tin un consensus cu e situacion di parkeer a mehora en general, y cu e mayoria di persona (54.1%) ta hay'e relativamente facil pa haya un lugar di parkeer. Mes momento, tin hende cu tin un reto pa haya un lugar di parkeer cerca di nan localidad di trabou (45.9%).  

SUGERENCIA

Varios sugerencia a wordo menciona den e parti 'habri' di e encuesta. Entre nan, pa reduci e suma di e permiso di parkeer, ya cu 60 florin (e tabata 75 florin prome:red) ta hopi caro pa esnan di salario minimo. Tambe ta pidi pa considera garashi pa parkeer (cu tabata plan tambe inicialmente:red). A pidi tambe pa haci e lugarnan geel (pa esnan cu tin permiso mensual:red) transferibel entre companianan of tin un ID di e compania. Tambe a pidi pa reduci e suma di parkeer pa 1 florin pa ora (e ta 2 florin awor:red). Un punto interesante cu mayoria a bay di acuerdo, ta pa laga esnan cu tin v-car (turista) parkeer pornada, pasobra mayoria awor di esnan cu ta haya problema (klem auto, problema cu pago) ta turistanan. Ademas kier un miho opcion di pago pa e turistanan (credit card y placa Mericano). Tambe a pidi pa un suma fiho of parking pornada den weekend pa stimula compras. Y asina tin hopi mas sugerencia. Por lesa e encuesta su resultado completo aki.