Obligatorio pa plak sticker di control riba windshield

ORANJESTAD - Contrario na informacion suministra inicialmente, automobilistanan cu no pone e sticker di control di pago di impuesto riba number di auto, por y lo wordo multa pa polis. Asina un comunicado di polis a informa diadomingo anochi. Algun tempo pasa, for di seno di polis mes a informa NoticiaCla.com cu mientras cu ta eherce control di trafico, nan no por a multa automobilistanan pa no a pega e 'sticker' riba e windshield di e auto. 

INFORMACION NO CORECTO

A resulta cu e informacion ey suministra no tabata corecto y cu nan 'no a mira e parti di e ley cu ta prohibi esaki'. Un fayo humano cu nan a 'overlook'. P'esey inicialmente a bisa cu no tabatin un provision den e ley pa e multa. A compronde for di polis mes, cu inicialmente tabatin hopi confusion entre polisnan pa cu e control ey y como tal no tabata multa automobilistanan cu no por a presenta e sticker pega riba nan windshield.  

SISTEMA NOBO

Segun e comunicado di polis oficial, e aña aki Servicio di Impuesto di Aruba a introduci un sistema nobo pa controla si impuesto riba vehiculo di motor ta paga. En bes di un number di auto cu un color diferente cu e aña prome, a opta pa laga e mesun number, pero cu un sticker di control riba windshield. Ta obligatorio pa pega e sticker di control riba un vehiculo di motor cu no ta un brommer.

BASE LEGAL

Pa loke ta e base legal rond di plakmento di e sticker aki, Cuerpo Policial ta subraya cu impuesto pa vehiculo di motor ta wordo regla den e ley cu yama ‘Motorrijtuig- en motorbootbelastingverordening’ (AB 1988 GT 23). Articulo 10 inciso 2 di e ley aki ta stipula cu prome cu final di cada aña fiscal, Minister di Finansas ta duna reglanan mas detaya relaciona cu e midi, e combinacion di color, e combinacion general di letter y cifra y e gastonan di e plachi di number como tambe tur otro particularidad. 

DECRETO MINISTERIAL

Pa cu ehecucion di e articulo aki, Minister di Finansas, a saca e Decreto Ministerial dia 2 di december 2015. E decreto aki ta stipula cu pa aña 2016 e plachi di number di aña 2015 ta keda valido y tambe ta regla e stickernan di control den articulo 21. E decreto ta stipula cu pa e supervision riba e cumplimento di e belasting ta otorga un sticker di control. Mirando cu pa aña 2016 no tin plachi di number nobo, e sticker di control ta tuma e funcion di comprobante visual di pago di belasting. P'esey e sticker ta importante pa cu e supervision adecuado door di Cuerpo Policial riba pago di e belasting 2016. E ley ‘Regeling kentekens motorvoertuigen’ ta contene reglanan riba e forma cu mester pega e plachi di number riba un vehiculo di motor. Debi na introduccion di e sticker di control, e decreto ministerial ta stipula den articulo 27 cu ta agrega un inciso mas na articulo 1 di e ley ‘Regeling kentekens motorvoertuigen (AB 2000 no. 22). E inciso nobo aki ta stipula cu e stickernan di control pa aña 2016 ta wordo pega na e windshield di un vehiculo di motor na e parti paden, banda drechi abou, ariba di e comprobante di keuring, na un manera cu e ta claramente visibel. Cu ‘claramente visibel’ mester compronde cu no mag di tin ningun obstaculo cu ta dificulta e visibilidad di e sticker. P'esey tambe e nota aclaratorio di e decreto ta bisa cu den caso cu tin tint riba e glas, mester elimina esaki. 

KICO E LEY TA BISA SPECIFICAMENTE

Ley ta bisa specificamente cu e chauffeur cu wordo haya riba careteranan publico cu no ta cumpliendo cu entre otro e stipulacionnan di e decreto ministerial manera referi den articulo 10, por haya un boet di maximo Afl. 300,-. P'esey si acaso un cliente a paga su belasting, pero e no a pega e sticker riba e windshield di su auto, esey por causa cu toch e por haya un boet di polis, debi na incumplimento di e reglanan stipula den e decreto ministerial a base di articulo 10.