E prome Polisnan di pais Aruba a celebra 30 aña di trabou

ORANJESTAD - Regularmente Mando Policial ta celebra cu e Polisnan cu alcansa 25, 30, 35 y de bes en cuando hasta 40 aña di trabou. Recientemente a invita dos Sub Inspector, Clyde Peterson y Dennis Jacobs, pa un reunion cu Alto Comisario di Polis unda a recorda cu na januari di aña 1986 nan a drenta e prome klas di Scol pa Polis di pais Aruba.

DENNIS JACOBS

Dennis Jacobs no ta un desconoci den e Cuerpo di Polis. E tabata traha na Lago te ora cu el a cera, pa cual el a solicita pa bira Polis. Den su carera pa hopi aña el a traha como recherche den Departamento di Droga y ultimo añanan e ta hefe di Team Bijzondere Projecten bou cual "Atraco Team" tambe ta resorta.  

CLYDE PETERSON

Clyde Peterson, cu awe tin e funcion di Sub Inspector a conta cu "Nos tabata e prome klas di pais Aruba, despues cu nos isla a haya su Status Aparte na 1986 y mientrastanto 30 aña a pasa, masha lihe. Nos tabata e prome klas desde nos isla a bira independiente, nos no a bandona nos pais, nos a keda traha duro te awe."