Cabesante Colegio San Antonio: Nos ta super orguyoso di nos scol renoba

ORANJESTAD - "Mi ta super contento, super orguyoso, cu nos ta den nos cas bek. No solamente nos scol ta renoba, pero tecnologia ta nobo tambe. Awor aki nos tin un sistema nobo y moderno di coriente, tur klas tin airco, tin sistema di WiFi pa henter e scol. Nos no a djis muda den un scol, sino den un scol moderno", asina Mario Tromp, director di Colegio San Antonio a duna di conoce na reapertura di e scol diabierna. E scol a cuminsa cu e renobacion total na 2013, pa cual a muda e alumnonan pa Dakota. 

HISTORIA DI E SCOL

Na aña 2001, Colegio San Antonio tabata conta cu algo mas di 250 alumno na e scol, pero a crece hopi te cu awe nos ta conta 421 alumno na e scol. Na aña 2012 a haya nan cu un problema na e scol den e lokaal di Biologia pa cual a cera un hala di e scol. E tempo ey den forma urgente, mester a bay uza algun barak den cura di e scol. Na aña 2013 a muda pa Centro di Bario Dakota mientras a cuminsa traha riba e scol mes. E scol a cuminsa oficialmente na aña 1959, bou maneho di Zuster Cecila. A cuminsa cu dos lokaal na Maria School e tempo ey, mientrastanto a cuminsa construi nan propio edificio cu despues a bira St. Antonius College, cu a habri na aña 1960. Desde e tempo ey a bira e prome scol mengua, den cual tabatin mucha homber y mucha muhe hunto. Na e mesun edificio a start cu nan mesun klas di HAVO cu e tempo ey nan tabata yama HBS y tabata duna les atardi of anochi. Cu tempo a combina ETAO cu MAVO y na caminda a start EPB y na mes momento ETAO a sali for di MAVO. Na aña 1977, Esteban Solognier a bira director di e scol. Na momento cu Zuster Cecilia a stop di duna les y a bandona scol, a ofrece pa yama e scol na su nomber, como esun cu a funda e scol, pero el a nenga y a prefera pa mantene e nomber, pero cambi'e na papiamento. Asina a cambia e nomber pa Colegio San Antonio cu ta e patrono di studiantenan. Desde aña 2001, meneer Mario Tromp ta director di Colegio San Antonio y ta trahando duro pa hiba e scol padilanti.