Hooyboer: Toets nacional pa alumnonan di 6e klas ta bek den enseñansa basico

ORANJESTAD - E toets nacional pa alumnonan di 6e klas ta bek den enseñansa basico. Riba iniciativa di Minister di Enseñansa y Famia, Michelle Hooyboer-Winklaar, e Toets Final Nacional (Nationale Eindtoets) lo drenta scolnan basico bek despues di 6 aña. E toets aki ta pa tur alumno di klas 6 di enseñansa basico cu ta subsidia door di Gobierno. E toets lo consisti pa e aña escolar aki solamente di preguntanan pa cu e area di formacion; Matematica.

FECHA PA E TOETS

Riba 9 y 10 di juni proximo, tur alumno di klas 6 lo contesta 90 pregunta di matematica dividi den 4 parti durante 2 dia. E preguntanan ta cuadra totalmente cu kerndoelen di matematica, loke a wordo introduci na comienso di aña escolar 2015-2016.

META DI TOETS

"E meta di e toets aki no ta pa wak si scolnan ya caba a logra yega e metanan nucleo (kerndoelen), cu apenas a wordo introduci na october aña pasa, pero si ta pa duna e scolnan un bista di e nivel di nan enseñansa di matematica na momento cu kerndoelen nacional a wordo introduci. E ta simplemente un "nul meting" pa nos por establece na unda cada alumno y scol ta actualmente", asina Minister Michelle Hooyboer-Winklaar a splica durante e dos dianan di encuentro cu tur cabesante y maestronan di 6de klas. 

TRAHA DI MANERA ANONIMO

E toets lo wordo traha na un manera totalmente anonimo y no tin niun consecuencia pa cu e conseho, eind rapport of aceptacion di alumno na e scol secundario. Tur scol y alumno ta ricibi un number cu lo wordo usa pa identifica e scol/alumno. No ta necesario tampoco pa alumnonan train pa e toets aki. Loke lo wordo midi ta kico e alumno a siña na scol basico pa cu matematica y no locual nan a train p'e den un par di siman.

FORMULA PROPIO PLAN DI MEHORACION

E resultadonan ta importante pa e scol por formula nan propio plan di mehoracion pa cu e parti di matematica teniendo otro factornan tambe na cuenta mirando cu no ta e scol so ta determina e resultadonan final di e alumno. Otro factornan tambe ta hunga un rol por ehempel si e alumno ta anima pa studia, cualkier retraso den materia for di añanan anterior, of si tin problemanan personal cu por ta afecta e prestacion di e alumno. 

BISTA DI NIVEL NACIONAL

Cu e Nationale Eindtoets, Gobierno tambe ta haya un bista di e nivel nacional y diferencianan entre scolnan cu ta existi riba tereno di matematica despues di algun luna cu Kerndoelen ta andando y asina por sigui e proceso aki riba un nivel nacional pa midi su efectividad. E ta duna un indicacion di unda Aruba ta cu su enseñansa di matematica y unda nos lo tin cu adapta of pone enfasis adicional. E toets Final Nacional lo consisti otro aña tambe di preguntanan di Taal, ya cu otro aña ta introduci Kerndoelen di Taal.