DESPA: Dialuna ta baha dak di asbest na Arco Iris Kleuterschool

ORANJESTAD - Dialuna awor dia 11 di april lo cuminsa cu trabounan di renobacion na Arco Iris Kleuterschool. E trabounan aki ta encera bahamento di e dak di asbest. Leslie Escobar di Departamento di Salud Publico (DESPA) a splica cu hunto cu DTI, DOW, Polis, Brandweer y Meteorologische Dienst a evalua e situacion pa sigura cu ta tuma e medidanan di preocaucion necesario pa minimalisa e risico di contaminacion cu asbest. 

APROBACION

E departamentonan a sinta hunto pa evalua e proyecto, pa percura cu ta tuma e medidanan necesario y tin un plan cu ta safe, e compania a haya aprobacion for di e diferente instancianan di Gobierno pa por cuminsa cu e trabounan. E compania encarga ta Freman Construction & Maintenance NV. 

REKISITONAN

Despues di a cumpli cu e rekisitonan pa por cuminsa, awor ta informa pueblo cu e trabounan ta bay cuminsa. E proyecto ta bou di control, cumpliendo cu e reglanan stipula, pa asina aki elimina of mitiga e riesgo pa ora di e kitamento di daknan di asbest ta bay cu menos exposicion posibel. Esey ta wordo garantisa den e proceduranan cu e compania ta bin cu ne. Por ehempel e manera con nan ta wrap’e, muha e material entre otro, cu ta garantisa cu e chens cu e asbest ta bin den aire ta minimo.

AIRE MIDI Y CONTROLA

Meteorologische Dienst cu ta yuda DESPA pa loke ta e direccion di biento y midi tambe e cantidad di asbest den aire. Tur eseynan ta garantianan cu a pone rond di e proyecto aki pa e por tuma luga di un manera mas safe posibel.

ORARIO DI TRABOU

E trabounan lo tuma luga durante 5 dia for di 6:00am pa 2:00pm. Durante e trabou, e departamentonan di Gobierno manera Salud Publico, DTI, Brandweer lo controla na Arco Iris Kleuterschool y e habitantenan rond. A haci un pre evaluacion, e instancianan ya menciona a duna aprobacion y durante cu e trabounan ta tuma luga tambe, lo bay tin e proceso di evaluacion di control pa percura cu tur cos ta cana manera palabra.

HABITANTENAN NA ALTURA

A pone e habitantenan na altura por medio di un carta y ta pidi nan pa tene e siguiente extra medida di precaucion na cuenta: Purba di tene e porta y bentananan cera durante cu e trabounan ta tuma luga; No colga paña na cabuya pafo; Mucha y hendenan grandi no por ta den cercania di e trabounan y ta consehabel pa nan no t’ey durante di e trabounan; No pone cuminda di bestia, ni e bestianan pafo; Esey ta entre otro medidanan di preocaucion pa minimalisa e riesgo. Si tin cualkier eventualidad por tuma contacto libremente cu DESPA.