Salsbach : Hopi bishitante na hospital cu tendencia di presion halto durante control

ORANJESTAD -   Di bishitantenan cu a check nan salud siman pasa na Hospital, hopi a topa cu e tendencia di presion halto, mas cu esunnan cu sucu halto segun dietista Angelique Salsbach. A duna nan tur informacion kico por haci desde awo, cu miho nutricion y mas movecion, banda di cu mester bay bo Dokter di cas pa cuminsa un tratamento. Hospital tambe a aporta grandemente na e dia mundial di salud e aña aki. 

DIA DI SALUD

E aña aki Dr. Horacio E. Oduber Hospital a organisa un chekeo di salud, principalmente riba e parti di presion y diabetes, cu ta enfermedadnan cronico cu ta afecta nos comunidad masha. A organisa e chekeo aki na entrada di Hospital, unda tur bishitante por a probecha pa check nan salud gratis. 

SALSBACH

Angelique Salsbach, dietista na Hospital a splica cu dos nurse a sinta pa check tur interesado pa nan presion y sucu. Cu e resultadonan aki nan tabata pasa cerca dje pa por a haya mas informacion con pa preveni. Si acaso nan test no a sali asina bon, por coregi esaki a traves di nutricion. E mensahe mester ta duidelijk cu esaki ta e parti primordial, esta cu mester cambia estilo di bida, cambia nos custumbernan di come, nos mester cuminsa come mas saludabel. No solamente nutricion, pero movecion tambe. Ambos ta bay man den man, esun no por sin e otro y e otro no por sin esun!

CONTENTO CU MENSAHE

Angelique Salsbach ta contento cu e mensahe di biba saludabel ta “all over” den e dianan aki. E ta asina importante pa nos realisa nos mes cuanto nos mes tin den nos mesun man pa preveni cualkier forma di enfermedadnan cronico a traves di nutricion saludabel.

ENFOKE PA COME SALUDABEL

Enfoca pa come saludabel ta bo nutricion diario y preferiblemente mas tanto den version fresco y no asina tanto cuminda procesa. Mester cuminsa pensa mas y mas pa nos mes cushina y nos mes prepara nos cumindanan, pa nos mes tin control riba nos nutricion, door di prepara esaki nos mes. E ora bo sa cu bo no a hinca hopi salo y e ora bo sa cu bo no a hinca sucu den cuminda, etc. Tin cu evita tanto cuminda di bleki, di boter y di paki cu ta procesa y no saludabel. Nos mester come mas cuminda prepara fresco y mas cuminda deriva di vegetal.

TENDENCIA DI PRESION HALTO

Salsbach a comenta cu di e bishitantenan cu a check nan salud, hopi a topa cu e tendencia di presion halto, mas cu esunnan cu sucu halto. A duna nan tur informacion kico por haci desde awo, cu miho nutricion y mas movecion, banda di cu mester bay bo Dokter di cas pa cuminsa un tratamento.