Ex director Parke Arikok ta apela e veredicto contra dje

ORANJESTAD - Ex director di Parke Arikok Emil ter Horst ta apela e sentencia recientemente contra dje. Asina ter Horst a confirma na NoticiaClal.com den fin di siman. segun e ex director, e y su abogado (mr Jeanot de Cuba) ta preparando un apelacion pa por 'kibra' e "appelverbod", esta e prohibicion di apela. Manera ta conoci e sentencia recien luna pasa contra e ex director, no ta duna e oportunidad pa un apelacion. Algo cu ter Horst pues kier haci toch. "Mi ta spera cu pa diabierna otro siman nos entrega e apelacion ey" ter Horst a sigui bisa.  

E SENTENCIA 

Tabata dia 24 di maart ultimo cu hues a dicta cu ter Horst su contract como director di Parke Arikok ta keda disolve 'per direct'. Un sentencia cu a bin un casi tres siman prome cu tempo esta dia 13 di april proximo.  Den e sentencia hues a dicta cu e 'ontbinding' ta drenta na vigor 'per direct'. Ademas, hues a determina cu mirando e circumstancia y loke a wordo treci dilanti, ter Horst no ta haya compensacion financiero manera cu el a solicita. Y finalmente, hues a determina cu ter Horst tabata responsabel pa e problemanan y cu e no a tene su mes na e 'plan di accion' manera conveni ya cu ter Horst lo tabata contradeci esaki. 

PROME REACCION

Prome reaccion di ter Horst riba e veredicto, tabata uno unda cu e tabata hopi desapunta den un sentencia net prome cu fin di siman di pasco grandi. 

Di un banda ta conoci cu un sentencia den un caso di trabou entre un director y un directiva semper ta previsibel, 'pasobra un hues no por manda e dunado di trabou cas pero semper e director. Pues tambe cumi" ter Horst a bisa e momento ey. E sa pasobra e ta casa cu un huez. 

INICIATIVA PARALISA

E ex director a lamenta e asunto pasobra awor diripiente varios iniciativa ta para keto atrobe. Loke a duel ter Horst mas ainda, ta cu 'e hues a kere tur e 'storianan' di directiva y ta parce cu no a ni lesa mi defensa'. Segun e ex director, el a admiti cu e storianan di directiva tabata simpel y bon hinca den otro, pero e hechonan tabata seriamente bira y of un mentira. "Asina e hues tabata kere p.e. cu mi ta responsabel pa fayonan di parti administrativo di pensioen siendo cu ta net ami a resolve e problema aki. "Mayoria di e fayonan tabata di prome cu mi tempo, y a cay completamente bou di responsabilidad di directiva". 

SENTENCIA POSPONI

Tabata comienso di luna pasa cu hues a opta pa pospone e sentencia di e caso di Parke Arikok contra su director te april. Esey ta nifica cu e incertidumbre lo a keda por lo menos un luna mas. Durante e periodo aki, e director no tabata permiti pa bay trabou, mirando cu apenas un siman prome a ponele riba ‘non actief’. 

NON ACTIEF

Director di Parke Arikok a wordo poni op ‘non actief per direct’ algun siman pasa tardi. “Mi a ricibi un mail bisando cu mi ta riba non-actief, cu e motibo cu mi ta ‘hits op’ e personal. Por lo menos esey tabata un di e motibonan duna den e mail. Jammer” Emil Ter Horst a splica NoticiaCla.com e tempo ey. E no ta compronde e accion aki, mirando cu falta apenas un siman pa huez dicta sentencia den caso di desolvimento di su contracto.

DISPUTA ENTRE DIRECTOR Y DOÑO DI TRABOU

Manera ta conoci, tin un disputa formal laboral entre e director y su dunador di trabou pa cual algun siman pasa a cuminsa un caso sumario pa retira e director. E veredicto ey tabata programa pa 1 di maart . E director no tabatin pensa di bringa e punto ‘nobo’ aki pasobra no tin sentido pa haci tal. Segun ter Horst, si e lanta un caso awor, hues lo bis ‘e cu ta otro siman caba tin un veredicto, pues esaki no tin sentido. E lo papia si cu e directie diamars pa wak kico por saca afor di e motibo aki. Ademas ter Horst a confirma cu e tin gana di keda, y lo purba tur cos pa keda traha cu e parke, sea ta como director of un otro posicion, pasobra e ta gusta e trabou.

 REACCION DIRECTIVA PARKE ARIKOK

For di directiva di Parke Arikok, NoticiaCla.com a haya e siguiente reaccion di Greg Peterson e tempo ey. "Lamentablemente e falta di confiansa cu e directiva tin den e director, a deteriora mas aun, lagando e directiva cu ningun otro alternativa". Pues segun Peterson, no a keda e directiva nada otro cu pone e director riba non actief debi na su comportacion cu lo a 'deteriora' mas ainda.