Futuro aeropuerto Bonaire insigur

KRALENDIJK – Cu retiro 'en bloc' di e hunta di comisario di aeropuerto di Bonaire diaranson (6 di augustus 2014), e situacion na e aeropuerto ta bira uno confuso mirando e cambionan cu e aeropuerto ta a punto di haci. E hunta di comisario completo a dicidi un dia prome ( 5 di augustus) cu nan ta retira di nan funcion ‘en bloc’. Como motibo principal, nan ta referi na fayo di maneho di gobierno di e isla, y ta referi na e CCG (Code Corporate Governance) cu gobierno mes a anuncia dia 22 di december 2009, pero cu nan no ta siguiendo.

Intentonan pa riba un termino cortico resolve e proceso di bon gobernacion cu e gobierno local, -cu ta stanca-, pa por crea un situacion di trabou normal, a pega. E hunta ta sinti su mes hopi stroba pues pa por ehecuta nan tarea legal. Como tal nan ta lamenta cu nan mester a yega na tal decision abrupto, conciente cu ta net na momento tin cu tuma desisionnan crucial pa cu e funcionamento di e aeropuerto internacional.

Entre nan, NoticiaCla a compronde di su fuentenan, cu tin e proyecto di expansion di e aeropuerto pa asina por garantisa operacion exitoso di e aeropuerto. Tin informacion tambe cu gobierno lo tabatin intencion di nombra un ex politico den e funcion di director, pero cu no a conta cu aprobacion di e hunta di comisario. Entre nombernan menciona, tabata figura e ex politico Elhage, aunke e nomber no a wordo menciona pero ta considera esaki un secreto publico na Bonaire.

Bek pa e carta di hunta di comisario di Bonaire International Airport NV, a firma esaki Jan Kloos como presidente y e demas miembronan Herbert Domacasse, Alain Maca, y Martin Sturkemboom.