Baby Lunah preparando pa bolbe Aruba

CALI - Preparacionan ta andando pa e popular baby Lunah bolbe Aruba atrobe. Den combersacion cu su mayornan, NoticiaCla.com a compronde cu tramitenan ta avansa y cu ta cuestion di dia prome cu e baby cu a haya asina hopi atencion ultimo lunanan, bolbe su isla natal. De hecho, nan lo mester tabata na Aruba caba, pero esaki a keda cancela. Baby Lunah despues cu a detecta cu probablemente e tin 'Trisomie 18', famianan no a entrega y bringa pa e salud di nan baby stima. Un bataya cu a gara henter e isla y cu a pone cu awe tur hende ta biba cu e pasonan di nan querido baby Lunah. 

SITUACION MEHORA

E situacion medico di baby Lunah ta di tal forma cu e ta wordo permiti pa bula caba y sigui su tratamentonan pa awor for di Aruba mes. Inicialmente e intencion tabata pa unabes na Aruba, e drenta hospital bek pa ontwen e di e zuurstof cu ainda e ta un tiki riba dje. Pero debi na un "zwarte griep" outbreak den hospital, awor a opta pa haci esey na cas mes pa no expone na e risico di gara e virus aki den hospital innecesariamente, paso Lunah ta keda un baby delicado.

BULA BAY COLOMBIA

Tabata e di dos siman di februari cu e mayornan a bula bay Cali Colombia pa busca un miho salud pa nan baby. Un siman despues baby Lunah a opera y for di e momento ey e salud di e baby tabata mehora tur dia. Esey a sigui, aunke logicamente tabatin e retonan cu cualkier baby delicado ta encontra na caminda. Pero awor, baby Lunah ta suficientemente stabil cu e por biaha y pa e momentonan aki sigui wordo controla y trata na Aruba mes.

CONOCE LUNAH

Lunah a nace 3 di december 2015. Algun dia despues (9 di december) a bin constata cu e tin un VSD (AVSD) grandi (buraco na curason y su hartklepjes ta mustra di ta mas diki cu normal). Na hospital nan a dun'e oxigeno pa un periodo cortico y medicamento pa su curazon. Despues di tres siman a haya resultado cu probablemente Lunah tin "Trisomie 18". E asina yama "Edwards Syndrome". Bukinan y estadistica ta indica cu e expectativa di bida di un baby cu Trisomie 18 ta hopi chikito. Door di e espectativanan aki e trend di cuido cu ta wordo ofreci ta limita, pero cu e añanan esaki a bin ta cambiando.

RESEARCH NOBO

Research nobo ta demostra cu muchanan cu Trisomie 18 tin un chens pa un bida mas largo y comfortabel si brinda nan e trato medico necesario y cu e revolucion di medicina tin pa ofrece awo. Tambe cu e cambio di mentalidad y cu tratando cada caso riba su mes y no generalisando, mas mucha cu e syndrome aki ta surpasando espectativanan di e estadisticanan. Lunah keto bay ta un ehempel bibo di esaki, ta un baby felis y ta demostrando cu e kier biba!