BCA: Confiansa di consumidor ta persisti di forma pesimista

ORANJESTAD - Mientras cu Banco Central den su ultimo rapport ta mustra cu no tabatin un crecemento den 2015, cos no ta mustra mucho mas alentador pa e aña aki. Por lo menos di parti di e consumidor. Segun Banco Central, pa 2016 ta anticipa cu consumo priva lo keda debil y lo baha, un biaha mas, cu 0,2 porciento, ya cu e confiansa di e consumidor no ta mustra señal di mehoracion y ta persisti di forma pesimista. Consumo di e sector publico ta proyecta pa refleha e esfuerso di gobierno pa reduci deficit fiscal conforme e meta legal. Consequencia ta cu consumo di e sector publico ta wordo proyecta pa mustra un bahada di 0,4 porciento den 2016. Sinembargo, importacion ta proyecta pa crece cu 0,7 porciento, impulsa principalmente pa importacion di materialnan di construccion relaciona cu diferente proyecto di inversion menciona anteriormente.  

BALANSA DI PAGO

E balansa di pago ta proyecta pa registra un surplus di Afl. 111,1 miyon, relata na mas desaroyo positivo den e sector no-petrolero. E saldo di e sector no-petrolero ta proyecta na un surplus di Afl. 340,8 miyon, stimula pa entrada mas halto di turismo y pagonan mas abou pa importacion. Ta anticipa cu e surplus aki lo wordo parcialmente mitiga pa un deficit di Afl. 229,7 miyon den e sector petrolero, resultando mas tanto for di e importacion di productonan petrolero pa uzo domestico. 

ACELERACION NIVEL DI PRIJS

E crecemento general den e nivel di prijs probablemente lo acelera un poco na 2016, mirando cu e promedio anual di e tasa di inflacion ta proyecta na 1,0 porciento. Prijsnan di petroleo crudo generalmente ta anticipa pa keda na nivelnan abou, cual lo limita presion di gastonan domestico mas halto.