FTA a pone ultimatum pa resolve asunto trahadonan ex Aura Casino

ORANJESTAD - "No tin negociacion ta andando cu ningun grupo". Asina presidente di sindicato FTA Hubert Dirksz a bisa NoticiaCla.com. E sindicato no ta nada contento cu e forma con cos ta bayendo pa e 44 trahadonan di ex Aura Casino cu ainda no por keda cla. "E grupo di Hindu Americano nos no ta considera serio y no a contesta" Dirksz a bisa. "Den nan ultimo combersacion cu Anselmo (Pontilius:red)  nan a declara cu nan ta warda riba nos, pero ta nos ta wardando riba nan" e presidente a sigui bisa. E trahadonan no ta mas leu y ta 'solamente' pago di cessantia nan a wordo priminti awor. 

FALTA DI SERIEDAD

"Nos no ta considera nan serio. Nos a pidi Minister Croes caba pa pone un deadline. Si ta pa nos, no mas cu un luna cual el'a compronde bon bon" Dirksz a bisa, indicando cu nan kier un ultimatum, pasobra no ta dispuesto pa warda mucho mas largo. " Pero ta gobierno mester pone esaki. Nos ta kere cu awor despues cu nos bay sinta cu gerencia di Occidental nos lo por haci e posibilidad pa un operador nobo mas atractivo, cu ta den man di e gerencia Occidental" e presidente a sigui bisa. "Mas o menos e trahadornan lo por haya nan placa di cessantia na fin di luna despues cu tur trahador pasa yena un formulario diasabra awor na SVb Vondellaan" a keda bisa.

4 LUNA SIN PLACA

E trahadonan ta drenta nan di 4 luna sin cu nan tin un pariba of pabou despues cu nan a tende cu e casino a cera su portanan na december. A priminti yen di cos, pero te cu awor, tur esaki a resulta den 'aros y coco', pues nada concreto. Hopi palabra a wordo duna, simannan a pasa y ainda e trahadonan ta wardando sin cu nan por keda cla. Riba su mes cada trahado tin nan riesgo ora di tuma un trabou, pero pa un of otro motibo e caso aki a haya mas atencion y ta halto riba agenda di hopi pa e wordo trata. Ta e forma con un compania ta cera su porta net prome cu fin di aña, lagando un cantidad di mama y tata diripiente ta habri aña sin sa kico ta spera nan. Esey a pone cu comunidad ta biba e momentonan aki cu nan mas, cu den un caso regular di ceramento di un establecimento.