Turismo mester 'rescata' Aruba su situacion menos positivo

ORANJESTAD - For di informacion di Banco Central, por compronde cu un biaha mas turismo lo mester 'scapa' e situacion di nos isla, mirando cu otro factornan no ta mustra positivo. Un riesgo principal na e proyeccion economico pa 2016 lo ta posibel retraso inespera of cancelacion den inversion planea di e sector priva, y tambe e ehecucion di proyectonan. Esaki lo por impacta crecemento economico substancialmente, lagando solamente e sector di exportacion di turismo como contribuidor principal na e producto bruto domestico (PBD). Riesgonan adicional ta inclui un continuacion di e falta di confiansa di e consumidor, y e bahada den consumo, cu lo por afecta e tasa di crecemento economico den 2016. 

POSIBILIDAD CU CITGO POSITIVO

Segun Banco Central, basa riba informacion presenta door di gobierno tocante negociacion cu ta andando cu CITGO, un factor principal cu lo por impacta positivamente ta un posibel reapertura di e refineria. Si esaki wordo realisa manera planea na 2016, e lo por conduci na inversionnan substancial y empleo adicional pa prepara e refineria pa produccion y operacion completo. Desmantelacion di e refineria tambe lo por stimula inversion y empleo adicional, aunke na un nivel mas limita.