Koningin Wilhelmina Fonds Aruba lo keda enfoca mas riba prevencion di cancer

ORANJESTAD - Cancer por toca tur hende den comunidad. Cancer no ta descrimina y tur hende por haya e malesa aki. Koningin Wilhelmina Fonds Aruba su meta ta pa concientisa comunidad riba kico ta cancer y con por preveni esaki. Aña pasa a inverti mas den e aspecto di prevencion. Esaki a suma na 108 mil florin y asina ta cumpli cu e meta di e fundacion cu ta prevencion por medio di informacion y educacion. 

Cada florin cu e fundacion ricibi di e colecta anual ta bai bek 100% den comunidad. Cu e placa aki ta yuda pashentnan di cancer y nan famia. E malesa aki hopi biaha ta bati inespera na nos porta y e ta un enfermedad cu ta hopi duro. Pa e motibo aki KWF Aruba ta sigui cu su campaña di concientisacion. Den luna di mei lo organisa un charla extenso riba e topico di cancer di pecho. Cancer awendia ta toca cada biaha hendenan mas hoben y pa evita esaki prevencion ta importante. 

Un bida saludabel, mas movecion y alimento saludabel. Aspectonan cu ta yuda preveni cancer y tambe ta importante pa haci controlnan regular, specialmente si tin hende cu cancer den bo famia.

E colecta anual di Koningin Wilhelmina Fonds Aruba a start dia prome di april y lo sigui te dia 15 di mei. Segun presidente di KWF Aruba Lilly Prince, aña pasa tabata un aña positivo pa e fundacion ya cu a logra cera cu un saldo postivo danki na e rifa grandi cu a tuma lugar den november. E rifa tabata iniciativa di Lenny Thijsen y un grupo di amiga. E entrada di e rifa aki a yuda den cubri un parti di e gastonan pa aña 2015. E gastonan di 2015 tabata en total 453 mil florin cu ta casi 35 mil florin mas cu 2014. E donacionnan di e colecta di aña pasa a baha pero sinembargo a drenta mas donacion di instancianan en general.

Cuido na cas ta forma 40% di e gastonan di KWF Aruba. Esaki ta un necesidad cu tin den comunidad y cu KWF Aruba kier yuda comunidad cu ne. E fundacion tin mas servicio, entre otro transporte di pashent, organisacion di charla y ayudo cu ta duna na pashentnan di cancer por medio di un pasashi pa e di dos acompañante. Tambe ta percura pa e muhernan cu haci un operacion di pecho haya un prothese y esaki ta wordo haci cu cooperacion di AZV. Tur yudansa cu KWF Aruba ta brinda na comunidad ta gratuito y esaki ta danki na e sosten di comunidad por medio di donacion.

Si bo mester di mas informacion, semper por acudi na nos Centro di Informacion na Spinozastraat 9 of yama 5820412. Tambe por bai riba nos Facebookpage Koningin Wilhelmina Fonds Aruba y nos website www.koninginwilhelminafonds.com.