Fiscal Mayor Blanken: Tiroteo Renaissance Marketplace ta e caso mas dificil

ORANJESTAD – E caso di tiroteo na Renaissance Marketplace na februari di 2012, tabata e caso mas dificil cu fiscal mayor Peter Blanken a atende durante su 5 anjanan den funcion na Ministerio Publico. Despues di 5 aña laborando na Aruba, Blanken a pone un punto final riba su trabou y ta cla pa bolbe Hulanda. “Mi ta haya cu ta suficiente y mi casa kier pasa mas tempo tambe cu su famianan. Esey ta suficiente tambe pa mi” Blanken a bisa su ultimo conferencia di prensa e siman aki. Pero e no ta bay sin prome mustra con positivo e ta laga nos isla, y con bon cos a bira for di momento cu e la yega. Unico punto di precupacion ta e resocialisacion di nos hobenan cu ta bin di e mundo criminal.

Segun Blanken, ora cu e la yega Aruba na augustus di 2009, e no a yega den e miho tempo y unda cu relacionnan entre Ministerio Publico y gobierno y prensa no tabata mucho bon. Esey a cambia awo y e por bisa cu e ta bay trankil cu e relacion sigur cu Ministerio Publico y prensa ta uno cu ta positivo y cu gobierno tambe. Su inversion den e relacion cu prensa sigur a pone cu awe Blanken ta un figura popular y positivo y cu semper tabata disponibel pa comentario, no obstante e momentonan mas critico di su periodo na Aruba. Hasta den su ultimo dianan na trabou cu e caso Carvajal.

E caso di detencion di e ex general Carvajal sigur tabata uno di tension y presion pa su oficina. “Pero mi ta contento pa bisa cu nos a haci tur cos bon, manera cu mester tabata e caso” Blanken ta bisa. Loke a sosode ta un novum berdad y na final a resulta cu segun Blanken, nada malo no a wordo haci pa su departamento. Blanken tambe a haya su mes confronta cu casonan di pasado manera Natalee Holloway y e morto di conocido personalidad Johnny “Poentje” Castro. Den caso di Holloway, ora cu Blanken a yega Aruba, e la haya un momento cu e la kere personalmente cu e lo a bay ‘resolve e caso aki’. “Mi a echt kere cu esaki lo tabata e momento” Blanken a bisa. Sinembargo rapidamente e ‘tip’ a resulta di ta uno cu no tabata nada particular. Di e caso Castro y Holloway, e ta admiti cu nan ta casonan ‘frieu’ pero cu asina cu tin ‘indicacion’ nobo cu lo atende cu esaki. “E ta rekeri hopi labor cu nos no tin” Blanken a bisa. Esey no kier men cu e no ta wordo soluciona.

E precupacion cu Blanken ta hiba bek cune Hulanda, ta esun di hobennan cu di edad relativamente abou ta envolvi den crimen caba, y cu no por haci mucho cu nan aworaki. Nan no por wordo persigui penalmente ainda y hunto cu un serie di problema compleho cu nan ta bin cune, ta keda un precupacion serio. Bisando esey sinembargo, Blanken ta conciente cu e no ta un problema na Aruba so, sino mundial. Pero e realidad ta cu riba un isla chikito maner Aruba, e ta mustra mucho mas problematico.

Blanken ta gozando di su vacacion awor y ta bolbe Hulanda dia 30 di augustus awor, unda cu e lo bay ocupa e funcion di Advocaat Generaal na Den Haag. Un funcion cu e la asumi den un periodo interino na Aruba, banda di su funcion regular di fiscal mayor. Banda di esey Blanken a fungi como PG tambe pa un periodo. Su reemplazante no ta conoci ainda, pero si e la confirma na NoticiaCla cu ta trata di un hulandes. Un campaña di solicitud no a duna resultado pa cual a bay directamente riba personanan specifico y aki si a logra haya hende. Mientrastanto cu e persona keda nombra, fiscal Lugo ta keda na su lugar temporal.