Inspectie a pidi hospital claridad riba caso mama y baby morto

ORANJESTAD - Inspectie di Salud a manda un carta pa hospital Horacio Oduber pa claridad riba e caso di e morto di e mama y un di su babynan durante parto. Miembro di e management team di Departamento di Salud Jerry Staring a confirma na NoticiaCla.com cu, mirando cu esaki ta wordo considera como un incident y ta algo conoci publicamente, a manda un carta pa Hospital pa puntra un 'clarificacion' di kico a pasa.

MELDING NO A DRENTA CERCA INSPECTIE

Mes momento Staring a sigui bisa cu e melding mes no a drenta cerca inspectie. "Pero for di inspectie a wordo tuma e paso pa acerca hospital pa haya claridad riba e incident'" Staring a finalisa bisando. Un rato despues a drenta un comunicado di hospital cu ta sigura cu hospital tabata debidamente na altura di e caso y cu e ta haciendo e investigacion caba.