HOH: Morto di mama y baby ta wordo investiga caba

ORANJESTAD  - Aunke cu ta e siman aki e caso di e morto di un mama y un di su babynan durante parto a bira popular riba red social, ya for di algun dia caba Dr. Horacio E. Oduber Hospital mes a start cu un investigacion. Asina e hospital ta sigura pa medio di un comunicado emiti. Esaki pa verifica cu tur procedura a cana segun normanan fiha. 

UN DIA DESPUES CU A PLAMA E NOTICIA

E comunicado ta bin un dia despues cu e noticia a plama riba red social (facebook). Segun e comunicado, a inicia un investigacion interno, den un esfuerso pa compila tur informacion relevante rond di e caso particular den cual un mama a fayece despues di parto, mescos un di su yiunan morocho. 

CONCLUSION DI E CASO

Segun e comunicado, Dr. Horacio E. Oduber Hospital ta sigura cu lo haci uzo di tur forma y instrumentonan pa yega na un conclusion riba kico a sosode cu e mama y e baby den e caso specifico aki. Ta pidi poco pasenshi di comunidad, pa por duna e expertonan oportunidad pa haci un investigacion riguroso y debido.

PUBLICACION DI POTRET Y VIDEO

Di otro banda, Hospital ta lamenta cu potret y video di un pashent interna den Hospital, practicamente for di tino y den coma, ta circula riba red social, sin cu e persona por defende su mes. Mester tene na cuenta cu den tipo di casonan asina semper tin dos banda di medaya y Hospital, como cu ta mara na secresia di pashent, no por divulga informacion priva di e pashentnan pa defende su mes. Pero tampoco por permiti cu otronan ta drenta paden como amigo pa graba of saca potret di un persona den un estado asina y comparti'e abiertamente asina riba internet.

CONDOLENCIA NA FAMIANAN

Dr. Horacio E. Oduber Hospital ta conta cu riba mil empleado bon prepara, capacita y cu experencia pa atende pashentnan interna pa tratamento medico. Ta expresa palabranan di profundo condolencia y forsa na famianan y conoci nan di e fayecidonan.