OM a pidi un castigo di 8 aña pa ex-polis de W. den apelacion

WILLEMSTAD - Awe pa 9 y mey di mainta, Corte di Apelacion a inicia cu e Casonan di Apelacion den Hato Shooting. Parti mainta lo atende e sospechoso Xavier de Windt, mientras cu pa 1 or y mey di merdia lo presenta Adriaan Martha, Judrin Martis y Raily Bart. 

Procurador General, Sr. Angela na nomber di Ministerio Publico a inicia den Caso di Hato Shooting awe mainta. E prome sospechoso cu a presenta ta Xavier Jonathan de Windt, naci na Corsou dia 20 di juli di 1986. Ministerio Publico tin 3 acusacion contra di dje. Hues Lewin a indica cu den e caso aki, ta e sospechoso ta esun cu a bai den apelacion y no Ministerio Publico. Xavier de Windt mes a drenta den sala cu su wowonan cora, y na su cara por tuma nota cu lagrimanan ta basha. E la tira un sunchi pa su famianan sinta den sala y aki atrobe lagrima a basha for di su wowonan. 

Den Corte di Prome Instancia a haña Xavier de Windt culpabel di a contribui na morto di Djais Juliana na Airport. Hues kier sa dicon Xavier de Windt a pidi pa apelacion.

Xavier de Windt: "E motibo cu mi a apela ta paso mi no ta culpabel di locual a sosode na aeropuerto. Mi ta admiti cu mi tabata bobo, mi a haci sin pensa, pero mi no tabata sa kico lo a bai pasa. Mi a comprende na prome instancia cu e informacion cu mi a busca y a yuda cu ne, y cu ta mi informacion a ser uza, mi a actua sin pensa, y mi sa cu e pida ey mi ta robes. Mi a ripara cu nan a haci maluso di e informacion aki. Ami a duna 1 persona e informacion, si e persona aki a pas'e pa nan, ami no ta na altura. Pero ami su informacion probablemente ta esun cu a yuda y esey mi sa cu ta malo." 

Xavier de Windt: "Ami a haña e informacion, y mi a mand'ele pa Basilia. Ora mi a mand'ele, un cruz cora a sali, cu ta indica cu e mensahe no a bay. Ami a sali despues y bai wak baseball caminda mi tabata na Merka. Eynan mi no tabata tin señal. Ora mi a yega bek for di baseball, mi a haña mensahe cu ta bisami kico ta e cosnan cu ta pasando na Corsou ey, tokante tiramentu na Hato etc.. "

Xavier de Windt: "Ami no por a caba di kere na e momentu ey, cu mi ta ser acusa di ta complice di un asesinato, caminda ami no tabata na altura di esaki." Hues Lewin ta puntr'e:  "Bo a busca informacion di Juliana y Arnhem como agente policial of komo persona? Xavier de Windt: " E unico cos cu ainda mi kier bisa den Corte aki, mi no por mas cu e castigo di prizon aki. Mi ta cera den un afdeling na Hulanda, 8 luna largo caba, caminda ta cera terorista. Den e afdeling caminda mi ta, tin un detenido ku aworaki a haña sa cu ami tabata polis." E detenido tur dia ta puntr'ami si ta berdad mi ta polis, pero mi no sa cu cua intencion. Mi tin varios prueba cu detenidonan sa cu mi tabata polis, y tur hende sa cu den prizon ora un hende haña sa cu bo tabata polis, con bo bida por core peliger." Esey so mi kier a bisa... " Keda pendiente pa mas informacion.