'The Art of Music' a demonstra calidad di nos propio hendenan

ORANJESTAD - Un anochi di musica domina pa e genero di Jazz, presenta pa un elenco impresionante di musico local (cu excepcion di algun) a laga e e centenares den sala di Cas di Cultura diaranson anochi pidi pa mas anochi asina. Ayera nochi tabatin e presentacion di e grupo di artista den e anochi titula Art of Music. Y e titulo tabata apropia. E arte cu cada un musico a desplega diaranson anochi tabata bisto. For di e prome tononan cu e organisador y artista principal Ivan Jansen a presenta, te na final, tur tabata un strea riba nan mes. Y comentario tabata unanime. Nos hendenan por competi cu cualkier artista internacional.

RETRASO CHIKITO 

Cu un retraso chikito acompaña pa un fayo tecnico, Ivan Jansen a sa te hasta di comberti e momento ey di stress inicial den un chiste. "Esey ta loke ta pasa ora cu bo ta live. Imaginabo den un partido di futbol y bo ta cay atras 2-0 na inicio, pa despues bin gana e partido 4-2." Algo asina, por lo menos Jansen a splica. Pero rapidamente e publico a compronde esey y e anochi a cuminsa. Un tras di otro e tononan tabata zona y Jansen a recorda tur presente di su dominio total riba su guitara(nan). E prome cancionnan tabata di su cd conoci cu a mustra kico e tabatin aden. 

REPERTORIO IMPRESIONANTE

Jansen mes a comparti su impresion di e anochi, ora cu el a recori e itinerario impresionante di e saxofonista Godwin Louis, di Merca, cu apenas algun dia prome a toca cu Winston Marsalis pa 'dialuna e ta tocando den mi cas. Increibel' Jansen a sigui bisa. Y asina e nochi a sigui. Un tras di otro e musica tabata resona den e sala. 

RANDALL CORSEN

Randall Corsen a demonstra su abilidad riba su piano(nan), y tabata pone e piano 'papia' manera cu Corsen so tabata por. Su interpretacion di un di e temanan di Doble R, simplemente a demonstra su talento atrobe. Y asina e anochi a sigui. 

RENO STEBA

Reno Steba a mustra su capacidad tambe di 'entretene' e publico cu su storianan prome cu algun di su tocanan. Entre nan, e splicacion spontaneo di e motibo di su composicion di 'e musca fastioso' na Alemania. 

HOMENAHE NA PADU

E anochi tabatin su momento un rato incomodo cu rapidamente a keda coregi tambe. Aki e cantante Lily Rodgers den su afan pa adresa e tata di cultura den sala Padu Lampe, a informe cu e ta bay 'drecha' un di su temanan, pa rapidamente coregi esaki y disculpa su mes. "Sorry", Rodgers elocuentemente a adresa su mes na e tata di cultura. Tur parti di un evento completamente bibo, unda cu emocion tabata parti di tur cos. Unabes cu Rodgers a cuminsa interpreta e tema y otronan tambe, tur fayo y momento incomodo a keda pa olvido. E voz impresionante di Rodgers a laga tur den sala impresiona. 

TATA Y YIU JANSEN

Un momento cu tur a warda, tabata e interaccion di 'tata y yiu', cu presentacion di Ivan Jansen y su yiu homber Serghio. E maestra di ceremonia rapidamente a recori e carera di ambos, recordando cu tata cu yiu a gradua di e mesun universidad Berkelee."Claro, uno mas prome cu e otro.. no asina hopi si" e maestro di ceremonia Rosabelle Illles a splica. Un encanto pa wak tata cu yiu presenta nan tema(nan) e anochi aki. 

INSPIRACIONNAN PROPIO

Ora cu Serghio a presenta su tema basa riba inspiracion di su tempo na Wayaka, e tata a admiti su 'roots', cu e tema "Mondi di Wayaka'. Tambe mester menciona e tema inspira pa muscanan den un camber di un amigo musical di Reno Steba na Alemania, cu finalmente a bira inspiracion pa 'Musca fastioso'.  

PABIEN IVAN Na tur, un ambiente musical grandi, unda cu remarcabel tabata e cantidad di musico amigo cu tabata den sala pa presencia e talento di nan coleganan. Un anochi sigur cu merece ripiticion. Pabien Ivan y su grupo!.