Resistencia gremial pa firma protocol AZV diahuebs awor

ORANJESTAD – Tin resistencia gremial pa firma protocol di AZV diahuebs awor. Algun gremio, tanto sindical como comercial, no ta sinti cu ta prudente pa firma e protocol diahuebs awor cu gobierno. Mientras cu nan motibonan ainda no ta conoci, nan a mustra cu nan no ta mucho pro pa haci esaki awor. Segun un articulo den e protocol, (lesa e protocol completo aki) ta e intencion di gobierno pa no mas laat cu 1 di september awor, introduci un impuesto ‘nobo’ cu nan ta duna e nomber ‘bestemmingsbelasting’ di 1% cu ta bay exclusivamente pa cubri gastonan di AZV. Hopi ta considera esaki como un aumento ‘camufla’ di loke nos conoce awe como BBO. Gremionan comercial y sindical a haya un concepto di e protocol presenta, den cual e intencion aki ta aparece como punto # 18 (di un total di 23 punto) di e protocol riba AZV, y cu tin cu wordo firma mas tarda diahuebs atardi hunto cu gobierno.

Mientrastanto, segun un nota cu NoticiaCla a obtene riba e financiamento di AZV entre 2014 pa 2017, e impuesto extra di 1% cu AZV ta yama ‘health tax’, mester genera por lo menos 21.2 miyon florin den e ultimo tres luna di aña 2014. Pa 2015 esaki ta aumenta te na 63.8 miyon y finalmente na 2017 esaki ta bira 69 miyon pa aña. Na tur calcula, e tin cu genera pues entre 5 pa 7 miyon florin extra pa AZV tur luna.

NoticiaCla a compronde di varios sindicato y algun gremio comercial cu nan no ta cla y/of no ta pro pa firma e protocol aki. Cu falta di firma di cierto, -of tur gremio mes- , no ta un garantia cu e impuesto ‘nobo’ aki no ta transforma su mes den un ley, entrante 1 di september manera cu gobierno ta sugeri. Manera cu gremionan a splica NoticiaCla, e ta simplemente un protocol cu ta duna gobierno un plataforma mas amplio di sosten. “Pero de facto, gobierno ta goberna, tin cu goberna y no mester di un plataforma” un gremio a bisa NoticiaCla diaranson mainta. Nan ta un di esnan cu no tin intencion di firma esaki diahuebs proximo.

NoticiaCla a compronde tambe cu tin por lo menos 2 gremio sindical y un gremio comercial cu no ta bay firma e protocol aki, pasobra nan ta sinti cu gobierno tin cu tuma medida den su seno prome cu nan dicidi pa bay pidi mas cooperacion di pueblo. Un partido politico tambe a mustra nan rechaso completo di e intencion aki y te hasta a pidi gobierno pa wanta e firmamento aki pendiente e resultado di e investigacion riba nos presupuesto, door di e College Financieel Toezicht, fin di luna.

Den un reaccion di e lider di e partido mas grandi di oposicion MEP esta Evelyn Wever Croes, NoticiaCla a haya cu “esaki ta totalmente no prudente ni responsabel pa core firma un protocol mas, sin warda CFT keda cla. CFT ta keda cla den e siguiente dianan, y ta falta di tur sorto di regla y etica di gewoon sigui bulldoze manera cu nada ta pasando. Gremionan ta firma cu un gobierno cu eigenlijk ta bou di curatela”. Asina pues Wever ta pensa riba e asunto aki y a papia na nomber di e partido. Otro partidonan no a duna nan comentario riba e asunto aki.

Gremionan cu a mustra nan resistencia pa gobierno bolbe pidi ‘sacrificio’ di pueblo enves di cuminsa corta vet serca nan mes, ta entre otro sindicato TOPA y e gremio comercial Camara di Comercio. Tambe e siman aki ainda e presidente di e gremio a mustra entre otro cu ‘gobierno mester trata dialogo social cu mas seriedad’ sino no por conta mas cu nan presentacion. E reunion pa firma e protocol aki, ta diahuebs atardi entre 4’or y 6’or.