ORANJESTAD - ( ADVERTORIAL) E relacion di ASTEC cu Aruba Ports Authority ta data desde aña 1983 den cual ASTEC ta e compania stiwado riba waf. ASTEC a inverti den e mudamento y awo ta responsabel pa e operacion completo na waf di carga na Barcadera. Siman pasa a celebra cu nos waf di carga awendia ta mas eficiente, mas moderno y capaz pa maneha mas carga sin stroba e desaroyonan di cruceronan cu ta trece turista na Oranjestad.
Manera tur hende por corda, APA a cancela e contract original cu ASTEC mediante decision di Corte fecha 21 di augustus di 2009. Cu e decision aki den man, Gobierno y APA por a lansa su plan pa organisa un destaho publico den cual companianan local y internacional por a participa. APA a anuncia publicamente cu 15 compania a mustra interes pa e destaho. Tabata un gran sorpresa cu tanto interes no a materialisa den varios oferta y ora di bid, ta solamente ASTEC a presenta y a gana e destaho publico conforme tur regla y cumpliendo cu tur e exigencianan mara na e destaho. E proceso a wordo facilita y supervisa pa AIB Bank hunto cu APA.
Tur 9 accionista local di ASTEC (segun un structura di partnership impone pa Gobierno na aña 1983) a participa den e inversion grandi aki di 80 miyon florin pa completa e proyecto di "Multi Cargo Sea Terminal".
Di acuerdo cu e destaho publico, e contract nobo entre APA y ASTEC ta pa un periodo di 25 aña, basa riba standard internacional y mara na formulanan di duracion segun un Public Private Partnership den maneho di wafnan di carga. Den e acuerdo, APA ta keda e autoridad maximo riba waf den su capacidad di "Landlord" mientras cu ASTEC como operado ta sigura un operacion eficiente y efectivo y ta mantene e facilidadnan di acuerdo cu parametronan y reglanan estableci.
E inversion grandi pa aumenta productividad, hisa eficiencia di servicio y aumenta e volumen di carga, ta rekeri un adaptacion di 4% na e tarifanan pa e aña calendario aki, segun e concesion firma entre APA y ASTEC.
ASTEC N.V. ta existi desde september 1983 y ta conta cu no menos di 80 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga.
ORANJESTAD – Den menos cu 12 ora, dos accidente separa a causa interupcion di coriente na Aruba. Si tabata blaas di helium, awor ta accidente tras di accidente ta sosode cu e mesun consecuencia. Mester bisa si cu e ultimo caso, ta mas bien un incidente cu un accidente. TA un truck cu a pasa ranca waya di coriente den area di Kudawecha cu a causa un interupcion grandi den area di Sabana Liber, Noord y vecindario. E interupcion awe mainta tabata algo despues di 9’or esta 9:08 di mainta. Esun prome, manera cu nos a raporta caba, a sosode algo despues di mei anochi, unda cu aki si un auto a accidenta mes, lagando suficiente destruccion atras di un palo di coriente completo.
ORANJESTAD – Diabierna marduga banda di 1:45 am, a sosode un accident na haltura di Franse Pas. Acausa di esaki un gran parti a perde coriente den area di Pos Chiquito,Sabana Basora, Burunbundo y Rooi taki. Tecniconan di Elmar a traha ariba esaki pa asina purba restablece coriente lo mas rapido posibel y pa 2:30am, barionan afecta a cuminsa haya coriente bek.
ORANJESTAD – Un dia despues cu e la duna cara riba e situacion di coriente na Aruba, minister Glenbert Croes ta invitado den e programa Noticiacla LIVE diahuebs anochi. Durante e conferencia tabatin varios ponencia di e mandatario cu lo keda trata awe nochi y cu periodista Tito Laclé por haya aun mas claridad pero tambe pregunta. Temanan manera refineria, y problema laboral tambe no lo falta den e programa cu lo ta en bibo cu e mandatario. E programa ta awe nochi 9’or en punto riba e plataformanan di Noticiacla, manera e Facebook page di Noticiacla, website y app.
ORANJESTAD – E baymento di coriente diaranson mainta a afecta varios scol unda cu alumnonan tabata den examen. Mirando esaki, Elmar a informa cu nan a opta pa duna scolnan prioridad pa cu esaki, y a percura pa suministra coriente prome na e area di La Salle Straat, Belastingkantoor y Solito un parti. Manera ta conoci, awe mainta coriente a bolbe bay den careda di 8:21 den e areanan menciona. Despues di mas of menos 30 minuut, coriente a cumnsa bin bek, dunando si prioridad pues na areanan unda cu tin scolnan cu ta pasando examen final.